Hopi a bay na evento di Aruba Astro Fest 2023 pa mira e Eclipse Parcial di Solo

ORANJESTAD (AAN): Diasabra merdia pa atardi, e Eclipse Parcial di Solo a wordo observa tambe na Aruba. 

Y specialmente pa esaki, un cantidad di persona a acudi na EPB Hato pa presencia e evento di Aruba Astro Fest 2023, y nan a yame ‘Eclipse Edition’.

   Space and Nature Aruba Foundation tabata completamente satisfecho cu e reaccion di publico.  Esey ta loke president di e fundacion, Jairo Vrolijk a declara den entrevista cu DIARIO.

   E evento tabata dedica na mundo di astronomia y ciencia, y Diasabra a probecha cu tin e Eclipse anular Parcial di Solo unda solo a tapa como 60%.

   Riba tereno di EPB Hato a traha tambe un presentacion di sistema solar, unda tin e solo como principal, y bo ta cana den e aula di e scol bay leu pa asina topa cu Mercurio, sigui pa mundo, pa Mars, etc.  Y e distancia di e planetanan ta poni segun escala.

   Pa prome biaha a introduci e Planetarium cu ta wordo yena cu aire, pues nan por move di un lugar pa otro cune rond di Aruba.  Tabatin presentacion tambe di Full Stack Foundation cu ta encarga pa yuda muchanan di edad hoben caba drenta den e era di coding di computer.