Hooiberg lo bira un producto di calidad hopi halto pa local y turistanan

Minister Dangui Oduber:

ORANJESTAD (AAN) – Den conferencia di prensa, Minister Dangui Oduber a gradici ATA pa su contribucion y tambe e board di TPEF, y Minister Wever-Croes pa e cooperacion cu tur e departamentonan cu ta resorta bao su ministerio ta brinda, pa e ehecucion di tur e proyectonan aki. Tambe a expresa su gratitud na tur su coleganan minister, fraccion di MEP y fraccion di RAIZ pa nan sosten. E dignatario a subraya cu nan ta trahando den un bon sinergia.

E mandatario a señala cu for di hopi tempo atras caba gobierno a institui un comision di Infrastructura di cual Ministerio di Turismo ta forma parti di dje, hunto cu ATA, TPEF, DIP, DOW y DNM ora tin mester pa asina alinea tur e proyectonan cu ta pendiente.

E mandatario a remarca cu tin un cantidad di proyectonan cu ta den ehecucion pa motibo cu den dos aña di e pandemia no por a sigui mayoria di e proyectonan cu a wordo prepara, pero awo a yega e momento pa haci e inversionnan necesario pa mehoracion y embeyecimento di producto Aruba, pa asina por ofrece un producto di calidad pa e bishitantenan. Aruba semper a wordo considera un destinacion di calidad  hopi halto, y turistanan ta na expectativa cu ora nan bin Aruba y paga e prijs cu nan ta paga pa nan vacacion, cu nan ta bay experiencia un producto di calidad.