Hoofd Stembureau no a haya base pa bin cu un reconteo

Glenn Thode a splica pakico: --ORANJESTAD (AAN): Diaranson mainta den Stadhuis na Playa, Conseho Electoral a tene nan audiencia rekeri pa ley,

unda ta determina e resultadonan final di e Eleccion 2021 teni siman pasa Diabierna.

   President Glenn Thodé di Conseho Electoral, a indica cu a base di Articulo 84 e Hoofd Stembureau por evalua si tin razon pa haci ‘nieuwe opneming’.  Ultimo eleccion no a tuma hopi atencion na esaki, pero e biaha aki si.  Pasobra tabatin hopi discusion y a ricibi diferente carta.  Tanto cu tin votador cu tabata pidi pa un reconteo.

   Hoofd Stembureau a mira e cartanan aki, y ta mira kico ta e base y unda cu tabatin base concreto, a haci base concreto, a bay repasa.  Otro cartanan cu no tabatin base concreto y ta djis algo general y no tin base riba hechonan, a descarta nan.

   Esaki a yega e punto cu Hoofd Stembureau no a haya base pa bin cu un reconteo na ningun di e urnanan, cu a produci resultado manera cu nan a sake conforme nan proceso y procedimentonan dilanti tur miembronan presente, como tambe checkers presente e anochi di 25 di Juni prome cu nan a cera e urna.  A yama e resultado, y despues trece esaki na Hoofd Stembureau y registra esaki riba e procesverbaal.

   Thodé ta a indica cu esaki ta loke ta mustra claramente e motibo pakico lo no haci un reconteo.

   PROTESTA: Tabatin un candidato riba lista cu eynan durante e audiencia a reclama cu na Stemlokaal 16 tin voto cu no a wordo conta pe.  Aki ta unda cu Sharin Luydens kende ta Director di Censo, a splica cu di cada Stemlokaal nan na Hoofdstembureau ta ricibi un procesverbaal cu ta bin cu lista individual di cada miembro.  E lista aki lo wordo pasa den un Excel Sheet.

   Por ehemplo den caso di Drs. Booshi Wever di Partido UPP, nan a mustra con tabatin diferencia den e procesverbaal y un ‘turflijst’.  Luydens a splica cu esaki no ta haci e resultado invalido, como cu e ta algo cu por socede semper den un eleccion manual.

   Thodé a mustra cu tur candidato riba lista tin di corda:  Cu ora un votador sali pafo di e urna, y e bisa “pa ken el a vota”, corda cu ta imposible pa bo controla esaki.  E voto ta anonimo!  E voto ta secreto!  E hecho cu un votador ta bisa cu e ta sigur cu el a vota pa cierto hende y cu por controla pa ken el a vota... esey ta un violacion di nos mesun fundeshi di proceso electoral.

   TIKI DI HISTORIA:  Aki Matutino DIARIO ta corda ainda con den eleccion 1994, cu candidata No. 23 riba lista di MEP a bay pleita fervientemente cu un miembro di su famia a insisti y hura cu el a deposita su voto pe na un Stemlokaal, pero eynan e candidata a haya 0 voto.

   E tempo ey, Sr. Pablo di Hoofdstembureau a dicidi na habri tur stembiljet bek den presencia di e candidata No. 23 aki pa e mira tur papel.  Na final, enberdad e candidata a bin realiza, cu el a haya 0 voto na e lugar ey, y cu simplemente su miembro di famia a gaña na un manera cruel mes.

   E candidata ey cu apenas a haya 25 voto den e eleccion ey, no a aparece riba lista mas di Partidonan Politico y a djis desaparece di bista publico.