Holiday Markets ta yama bonbini na dianan di fiesta na Hilton Aruba Caribbean Resort & Casino

ORANJESTAD (AAN): E di cuater apertura di Holiday Market ta inicia na Hilton Aruba Caribbean Resort & Casino den luna di december 2025.

E edicion aki di e mercado popular di dianan di fiesta cu artesano local lo tuma luga den e lobby principal decorativo riba 3 di december,10 y 17 di december entre 7pm pa 9:30pm. 

E mercadonan aki ta un manera bunita pa bishitantenan y localnan disfruta di loke ta e temporada di pasco aki na Aruba. Cada siman e encuentro lo inclui diferente selecion di artesania traha na man, y regalonan unico cu musica presentando tur e clasico cancionnan faborito di pasco.

Tambe tur siman un grupo diferente di artesano lo presenta nan creacionnan, incluyendo sea glass art, joyeria traha di lionfish fins, canvas painting, bela organico, piesa di palo, resin artwork, y hopi articulo unico.

Bishitantenan tambe por disfruta di loke ta un photo-op complementario y bay cas cu un potret memorabel como nan souvenir. E terapistanan na eforea spa lo ta presente pa asina ofrece chair-massage y tambe otro regalonan chikito. Aruba Animal Shelter tambe lo ta presente riba cada siman pa introduci nos bishitantenan na e trabao importante cu nan ta haci. Nan lo stock un variedad di regalo pa mascota, y si algun bishitante lo desea di laga un donacion esaki tambe ta posibel.

Agregando n'e ambiente festivo, Santa y su ayudantenan tambe lo tey presente. Bishitantenan y localnan di tur edad ta invita pa bin interactua cu Santa mientras nan ta shop of simplemente disfrutando di Aruba su spirito navideño.