ORANJESTAD (AAN)—Gina Maduro, Presidente di Sindicato ABV, contestando un pregunta den conferencia di prensa, diabierna ultimo, a bisa cu tambe e sindicato a trata cu Formador locual CAft ta pretende, pa Hospital sigui corta ainda mas den gasto di cuido medico.
Maduro a subraya cu nan no sa di unda CAft kier pa HOH corta mas pasobra nan a corta hopi den cuido caba, y riba su mes Hospital ta bahando su gastonan operacional. E trahadornan mes a ahusta nan CAO y a entrega algun beneficio secundario, pues no tin mas caminda pa corta.
“A corta e aorta caba y no tin vet. Dus awo bo kier corta e spier. Nos a duna tur di nos parti, y mi ta kere CAft mester lubida cuido un rato y wak unda tin otro caminda pa corta, cu si tin vet, y no den e aorta”, Gina Maduro a remarca.
El a agrega cu e sindicato ta constantemente na mesa cu e directiva di Hospital, y nan a para banda di ABV, pasobra nan a mira e efecto di e 5% aña pasa na Juli, y kico esaki tabata riba e trahador. Esaki ta haci dificil pa haya un specialista suplente, pasobra nan no ta bin, nan ta bay Bonaire of Corsow pasobra Aruba no ta atractivo mas.
El a splica tambe cu HOH ta trahando cu hopi trahador local, pero tambe cu hende di afo manera Hulanda y Belgica, y nan a cuminza bisa cu si ta asina cu mester sigui cu e cortamento, nan ta bay, pasobra e no ta atractivo mas y nan ta opta pa bay Corsow, Bonaire of Hulanda mes.
Mas bien mester evita pa Hospital perde mas personal, pero crea mas opleiding pasobra tin hopi hende ta bayendo cu pension y mester trata di tene nan trahadornan tambe, pasobra aworaki aki no tin hende mas pa haci e trabao ey, y HOH no ta un branch cu por haya facil, segun Gina Maduro.
“Mester cuida nos trahadornan, proteha nan, y tene nan”, Gina Maduro a reitera.
