E reunion di Formador Wever-Croes y sector comercial den tempo relevante - *Alivio financiero di e pais ta depende di un bon funcionamento comercio -*Un bon base comercial ta deshaci di e sistema di patronahe den gobernacion
ORANJESTAD(AAN)—2021 ta drenta historia como e momento di cambionan grandi cu a presenta nan mes y asina ta mishi cu e exigencianan di politiconan.
E formacion di un gobierno nobo ta den proceso na momento cu Aruba den un mundo ainda hopi confuso, mester habri caminda pa un futuro nobo.
Un bon gobernacion ta duna espacio pa cada sector den un comunidad funciona y keda encarga cu nan tarea specifico.
Na e momento cu awe Gobierno reuni cu instancianan comercial, un punto sumamente importante ta bini dilanti. Un punto cu tabata parce semper riba plataforma internacional, un cero riba caminda di bon gobernacion.
Bon gobernacion ta deshaci di tur responsabilidad cu no ta di Gobierno pa asina Gobierno keda cu su responsabilidad principal cu ta pa percura pa tur sector tin e base y espacio pa nan duna miho resultado.
Un mercado liber, un pais democratico, ta basa su mes riba e hecho cu pa medio di un bon situacion economico, comercio ta produci trabou y asina ta ofrece bienestar na trahadonan, cu ta entrega empresarionan nan trabou como nan producto.
Uno di e problemanan grandi cu gobernacion den pasado a conoce ta, cu na demasiado ocasion Gobierno a wordo uza como e origen mas facil y importante di empleo.
Beneficionan cu Gobierno ta duna na su empleadonan sigur a aporta na e hecho cu hopi hende tabata para den fila pa drenta servicio di Gobierno loke hopi bez tabata mishi directamente cu e sentido di integridad di un pais.
Un Gobernacion corecto ta crea e base pa comercio ta e instancia encarga cu mayoria di empleo segun leynan cu ta proteha trahado pero tambe ta sigura cu e gremio comercial no ta bira victima di loke comerciantenan no por tin como peso.
Den e proceso di formacion, un punto importante a wordo alcansa na momento cu Gobierno mester baha su gastonan, loke ta nifica cu Gobierno mester tin e cantidad husto di personal pa e funciona.
Por nota cu durante Gobierno Wever-Croes 1, atencion a wordo dedica na e punto aki pero tambe na e ampliacion di mercado comercial mescos cu introduccion di leynan y condicionnan special den tempo di pandemia, cu Gobierno a yuda comercio mantene su lugar como centro di empresa cu ta duna trabou.
Na momento cu awe Gobierno reuni cu gremio comercial, e base productivo di economia ta discuti e futuro di e pais cu Formador Wever-Croes, encarga di forma un gobierno cu e tarea di recuperacion den un tempo moderno cu lo permiti pa cambionan importante cu mester a wordo ehecuta den e proximo decada, wordo acelera.
Den e Masterplan cu a wordo uza dor di Prome Ministro Wever-Croes e creacion di un infrastructura a hunga un papel importante pa Aruba. Awe den reunion sin duda, e lo wordo reforsa y mas puntonan lo bini dilanti pa asina un paso importante na mehoracion di e calidad di bida wordo tuma.
Como principal dunador di trabou y generador di actividad economico, awe mundo comercial ta reuni cu e gobierno cu mester pone e base pa economia florece.
DIARIO ta keda en espera di e momento importante den formacion di un Gobierno, cu mester di un bon resultado di economia, di comercio pa un bon maneho financiero y social di e pais.
