HOH contento cu relacion positivo cu Embahada Hulandes y hospitalnan di Bogota

E biaha aki cu encuentro fructifero na Aruba

ORANJESTAD (AAN): Recientemente Horacio Oduber Hospital (HOH) a topa cu diferente Hospitalnan colaborado di Colombia y e embahada Hulandes di Bogotá, esta embahadora interino di Hulanda na Colombia sra. Caroline Ramaekers cu e meta principal pa intercambia puntonan di mehoracion pa futuro y alabes e deseonan y oportunidadnan riba tereno di cuido pa Aruba y Colombia. Aña pasa e encuentro aki a tuma luga na Colombia y e biaha aki tabatin e grato placer di yame nan bon bini na Aruba.

            Durante e encuentro drs. Jacco Vroegop, director di HOH, entre otro a haci un evaluacion di e tremendo ayudo ricibi di Colombia durante e di 4 ola di Covid-19. Pa motibo di escasez di personal y cama na Hospital di Aruba no por a atende tur pashent riba ICU na HOH y a opta pa transporta algun pashent pa Colombia. Tabatin presion extra y un situacion agudo na Hospital ora cu personanan no vacuna, esta tambe pashent, no por a biaha pa Colombia.

            Danki na intervencion diplomatico y un netwerk mutuo, aunke mester a pone hopi empuhe, a logra trece solucion pa pashentnan agudo y por a brinda nan e cuido necesario. Partidonan presente a intercambia puntonan di mehoracion pa futuro y alabes e deseonan y oportunidadnan riba tereno di cuido pa Aruba y Colombia.

            Intensivista dr. Benjamin Croes a splica di parti di HOH e importancia pa tin accesibilidad pa ECMO (ExtraCorporeal Membrane Oxygenation) esta na momento cu ta añadi oxigeno na sanger pafo di e curpa)  na Colombia. Aruba no tin ekipo pa haci esaki y door di manda y trata e pashentnan na Colombia, por a salba nan bida. Tambe ela trece pa dilanti e importancia pa explora oportunidadnan pa bin cu telemedicina na Aruba.          Tambe a toca e tema di  e deseo di acceso pa cirugia di transplante na Colombia pero desafortunadamente esaki no ta posibel actualmente. Señora Olga Rodriquez, business development manager di HOH, a papia tocante e escasez di personal di cuido na Aruba.

            E ta splica cu esaki por trece oportunidad y posibilidadnan pa personal Colombiano bin labora na Aruba unda sigur mester tene cuenta cu ta importante pa domina e idioma Ingles y cu mester tin un conocemento y abilidad medico ekivalente. Pa esaki a pidi ayudo y mediacion di e embahada.

            Finalmente a gradici e embahada atrobe pa e sosten duna pa cu e transferencianan di pashent, ayudo na famia y mediacion durante problemanan.

            E embahada na su turno a duna aprecio pa e esfuersonan grandi di personal di cuido y e importancia di esaki pa un isla manera Aruba. A priminti di sigui sostene y duna asistencia pa fortalece e cuido na Aruba, e oportunidadnan y alabes e necesidad pa nos, esta HOH, na Colombia.