Hobennan ta wordo recruta via medionan social y plataformanan di 'dating' pa traficacion sexual online

Prome Minister a elabora riba e campaña ‘No cay den Trampa’

* E tendencia di abusonan sexual y otro tiponan di abuso virtual ta creciendo 

ORANJESTAD (AAN):  Diahuebs 31 di augustus mainta, durante Conferencia di Prensa di Gobierno di Aruba, Prome Minister Evelyn Wever-Croes hunto cu Directora di Coordinatie Centrum Mensenhandel Mensensmokkel Aruba (CMMA), señora Jeanette Baars, a elabora riba e topico di traficacion di hende.

            CMMA ta hopi activo den esaki y ya ta diferente biaha den conferencia di prensa a elabora riba e topico pa mustra e importancia di esaki den nos comunidad. “Aruba ta un pais vulnerable pa e tipo di abusonan aki y niun ciudadano di nos pais kier pa e tipo di cosnan aki pasa riba nos baranca”, Prome Minister a expresa.

            E enfasis di e conferencia di prensa di diahuebs mainta ta basa riba e aspecto di enseñansan na nos hobennan y e rol di mayornan den esaki. Siman pasa, CMMA a lansa un aspecto nobo den e pakete di enseñansa riba Mensenhandel Mensensmokkel. E campaña aki, ‘No Cay Den Trampa’, ta hopi importante pa enseñansa, pa nos hobennan y mayornan pasobra tin preocupacionnan pa e siguridad digital di nos hobennan cu ta hopi online.

            Nos hobennan ta un grupo hopi vulnerabel, no solamente na Aruba, sino mundial, pa loke ta e  fenomeno di traficicacion online di hende. Uzo di medionan online ta creciendo mas y mas den nos hobennan.

            Muchanan y hobennan, pa medio di internet ta wordo recruta asina via medionan social y plataformanan online di dating na unda mucha y hobennan ta duna mas informacion di nan mes, cu detayenan di nan ubicacion y unda nan ta biba entre otro. Informacionnan aki hopi biaha ta cay den mannan di hendenan cu tin mal intencion.

            Tambe e tendencia di abusonan sexual y otro tiponan di abuso virtual ta creciendo. Hobennan ta post potret y videonan y esakinan ta wordo bendi y rebendi rond di mundo. Ta hopi importante pa na Aruba tambe nos pone hopi atencion na e problema aki, na e riesgonan y peligernan di internet.

            “Nos no kier haci un alerta solamente na nos hobennan, pero awe mi kier haci un apelacion especial na tur mayor. Como mayor nos kier e miho pa nos yiunan. Nos kier proteha y defende nan di tur cos malo cu tin eyfo”, Prome Minister a enftisa.

            Prome Minister a enfatisa cu e comunicacion entre mayor y yiunan, pa logra esaki, ta hopi importante. Y esaki mester ta asina tambe ora ta trata di cosnan online manera internet, WhatsApp y otro medionan social. Por ripara cu tin hopi mucha ta sinti nan mes hopi insigur y of tin hopi berguensa y no tin curashi pa papia di e cosnan aki.

            “Pa e motibo aki, ta importante pa abo, como mayor, keda monitorea y si nota cambio di comportacion den bo yiu, papia cu ne pa saca afo kico por ta pasando cu ne, sperando cu nunca e lo bira victima di algo asina. Mayornan tin e papel importante aki pa hunga den bida di nan yiunan. CMMA, ta percura tambe pa hunto cu docentenan y trahadonan social pa tin mas atencion riba esaki pa nos muchanan. Pero mi ta haci un apelacion na mayornan pa hunto nos cera cabes pa percura pa protehe nos muchanan”, Prome Minister a remarca.

            E Campaña di CMMA ‘No Cay Den Trampa’ ta pa conscientisa nos hoben y mayornan di e risiconan di e mundo digital. Pa haya mas informacion di e campaña aki, por bishita e website di CMMA www.cmaaruba.com.