ORANJESTAD (AAN): Den e mundo di awendia, ta mas claro cu nunca cu trabao y estudio ta cana man cu man.
E hobennan tin mas responsabilidadnan y un costo di bida mas halto, causando cu hopi di nan ta confronta retonan manera con por paga gastonan diario, mientras nan tambe ta haci nan esfuerso pa sigui cu nan estudio.
Pa hopi hoben, sigui un estudio no ta suficiente mas. Pa por haya un futuro mas stabiel ta rekeri nan pa busca un trabou part-time of un forma creativo di gana un entrada. Ta akinan unda creatividad y emprendemento ta bira crucial.
Di mes, cu no ta facil pa haya balans entre estudio, trabou y bida personal, pero hopi ta sinti cu no tin otro opcion si nan kier logra nan meta y biba na un manera mas independiente.
Un gran parti di e problema aki ta wordo motiva pa e realidad di un mundo cu ta cambia lihe. Tecnologia y digitalisacion a traha hopi oportunidad, pero tambe a pone mas presion riba e hobennan pa mantene nan relevante den un mercado di trabou cu ta competitivo.
Asina mes, e costo di bida, desde alimentacion te na educacion y vivienda, a subi asina tanto cu hopi famia no por atende cu e gastonan cu solamente e salario di un miembro di famia. Esaki ta pone cu hopi hoben mester sali pa busca nan propio manera pa contribui.
Pero, con por enfrenta e situacion aki? Hopi hoben ta busca inspiracion den plataformanan online, siña ofishinan nobo via tutorialnan, y con pa traha nan propio negoshi. Desde haci obra di man, bende productonan online, ofrece servicionan local manera haci diseño grafico, traha bolo of cuminda. E hobennan ta purba pone nan creatividad den practica pa gana un entrada.
Esaki ta mustra cu, mas cu un necesidad, ser creativo y emprende ta bira un habilidad fundamental pa sobrevivi den un economia global. Gobierno, scolnan, organizacionnan y comunidad por yuda tambe den esaki, stimulando capacitacion y ofreciendo mas oportunidadnan di apoyo pa emprendementonan chikito.
Na fin di dia, e hobennan ta traha pa nan futuro mientras nan ta lucha cu e retonan di presente.
