Silvienne Valdez-Krosendijk di EducationUSA
ORANJESTAD (AAN): EducationUSA Aruba ta estableci na Aruba desde cu a firma un MOU entre Gobierno di Aruba y Merca na aña 2021. EducationUSA ta duna tur informacion necesario na scolnan y muchanan na Aruba cu tin intencion pa sigui cu un educacion mas halto na Merca.
Den entrevista cu Matutino DIARIO, Señora Silvienne Valdez-Krosendijk, Academic Advisor EducationUSA pa tanto Merca y Canada, a remarca cu interes den nos muchanan pa sigui nan estudio na Merca ta creciendo mas desde aña pasa. Actualmente, deportistanan tambe ta mustrando interes grandi pa sigui studia na Merca y ta hayando e yudansa pa asina nan por haya un ‘athletic scholarship’ pa asina nan por sigui nan educacion y haci nan deporte na mesun tempo.
Señora Valdez-Krosendijk a agrega cu door di MOU cu diferente Universidad na Merca, y Canada prijsnan pa studia na e destinacionnan aki ta cay den e Arubalening. Den e pakete pa sigui studia, estudio, kamber, y cuminda ta inclui, diferente na Hulanda unda cu tur cos ta apart. Sinembargo, no necesariamente mas barata, pero si ta purba hacie mas accesibel pa mas hoben scoge e destinacionnan aki pa sigui nan educacion.
Pa hobennan cu tin interes pa sigui studia na Merca of Canada, por contacta EducationUSA Aruba pa un cita. Por haci esaki via paginanan social di Aruba, EducationUSA Aruba na Instagram y Facebook, y tambe riba website general di EducationUSA.
