Djurwin Croes di Arumil:
ORANJESTAD (AAN): Arumil a cuminsa su campaña di reclutamento luna pasa, dirigi na hobennan entre 17 y 27 aña cu ambicion pa sigui un carera den servicio militar. E campaña ta sigui te cu dia 31 di December, dunando esnan interesa ainda oportunidad pa aplica.
Den un entrevista cu DIARIO, Section Commander Troop, Djurwin Croes, a splica cu candidatonan mester tin nacionalidad Hulandes y un diploma di minimo Mavo, EPB Doorstroom, of un diploma ekivalente. Hobennan di 17 aña por aplica, semper cu nan cumpli 18 aña prome cu e formacion cuminsa na augustus proximo.
Croes a enfatisa cu drenta servicio militar ta un paso cu ta exigi seriedad, disciplina y compromiso. E hobennan mester compronde cu nan ta scoge un carera profesional, cu responsabilidadnan y exigencianan cu ta forma parti di nan trabao diario. Ademas, candidatonan mester tin un bon condicion fisico y pasa un test psicologico.
Pa e proximo grupo, Arumil ta busca aproximadamente 25 hoben pa participa den e formacion cu ta cuminsa na augustus proximo. E formacion ta tuma lugar na Corsou y ta dura seis luna.
Arumil ta ofrece un formacion paga, un bon salario, actividadnan deportivo, trabao varia y oportunidadnan pa desaroyo y crecemento profesional mientras nan ta den e formacion.
Tocante e condicionnan laboral, Croes a indica cu, despues di completa e formacion, e hobennan ta haya e status di semi-ambtenaar. Tambe el a informa cu ta traha riba un rechtspositie nobo pa e personal. Aunque e proceso ta tuma tempo, segun Croes, e ta avansa den e bon direccion.
Hobennan interesa por haya mas informacion y aplica via werkenbijdefensie.nl/arumil.