“Ya bo no ta Pan y Biña”
ORANJESTAD (AAN): Den fin di siman, DIARIO a tuma nota cu e hobencita local Carolyne Kock a lansa su cancion nobo cual ta un cover di e cancion di Jorge Luis Bohorquez "Una cancion para la comunion".
A haya sa cu esaki ta un idea cu a nace aña pasa pa Carolyne presenta un cantica dedica na Hesus mirando cu e aña aki Carolyne ta haci su prome santa comunion. E cantica aki tabata pas precisamente pa su prome santa comunion y pa e motibo aki a laga traha un cover di dje na Papiamento special pa e comunidad di islanan ABC.
E adaptacion di e letranan a worde haci pa Ruth Gaarie y Robert Kock, e recording y mastering tabata den man di Diego Henriquez di DH Music Factory y Carolyne su coach di canto tabata Ruth Gaarie. E video clip a worde graba na Parokia Sagrado Curason di Hesus na Savaneta. Un danki special na Pastor Andres di Parokia di Savaneta pa e oportunidad aki.
Carolyne su vestuario pa e video clip tabata den man di Merida Quant. Su Hair & make up tabata den man di Caithlyne Kock. E video clip a worde graba y edita pa Robert Kock, y tabata bow direccion di Chastity Kock-Hodge y Robert Kock. E video clip por worde mira riba internet na:
Esaki ta riba e youtube channel di Pitbull Advertising and Entertainment.
Un cancion canta pa un stem angelical cu un bunita melodia di piano y violin, cu ta refleha ariba e bunita momento di e sacramento di eucaristia ricibiendo e comunion. Un cancion pa por toca henter aña y tambe special pa un ricibimento.
Disfruta di "Ya bo no ta pan y biña" canta na Papiamento pa Carolyne Kock, cual tambe ta obtenibel na tur radio emisora dus yama pidi bo locutor faborito pa e bunita cancion aki. Ban apoya nos muchanan cu ta jen di talento. Un danki na Caithlyne Kock pa e bunita potret.
