ROTTERDAM: E caso cu a socede den dia cla den un McDonald’s na Rotterdam, a resulta di ta un asesinato riba un homber Curasoleño di apenas 22 aña di edad. El a wordo hinca cu un cuchiu.
Paramediconan eyfo dilanti McDonald’s mes den Korte Lijnbaan a trata di practica CPR, pa despues bay cune cu urgencia pa Hospital.
Autoridad a identifica e victima como Richairo Mariën kende ta biba na Helmond. E tin 22 aña di edad y ta naci na Curaçao.
Polisnan di Rotterdam a actua rapido, danki na descripcion amplio cu testigonan a duna, y den e area ey mes a detene e asesino ni mey ora despues. Ta trata di un hoben di apenas 19 aña naci tambe na Curaçao, y cu ta biba na Spijkenisse. Nan a confisca e cuchiu tambe usa den e crimen.
Autoridad a bisa cu Richairo a sucumbi di e multiple heridanan grave cu el a ricibi na e.o. su abdomen y pecho, tambe na braza, man y pia.
Como cu e momento ey ta ora di lunch y McDonald’s tabata yen, y caya tambe cu hopi peaton, a resulta cu ta monton di testigo a mira e acto cruel aki. Polis a haya nan ta busca varios persona di Bureau Slachtofferhulp pa bin trankiliza e testigonan aki cu loke nan a caba di mira.
Te ainda no ta conoci oficialmente kico a pone e hoben comete un crimen asina hororoso pa cual sigur e lo bay keda awor basta tempo encarcela, perdiendo tur su hubentud.
