SAN JUAN: Polis na Puerto Rico, y tambe di Operacion Aereo y Maritimo (AMO) di US Customs and Border Protection, a logra pone man riba tres homber cu tabatin 1.324 kilo di cocaina, cual tin un balor di 17.8 miyon Dollar.
Autoridadnan a bisa cu e accion a socede Diabierna anochi riba lama dilanti sector Buena Vista na Humacao, cu ta situa na e banda pariba di Puerto Rico.
E sospechosonan tabata riba un speedboat tipo GoFast di 35 pia largo, riba cual tabatin 40 bulto di droga. Den e bultonan aki tabatin yen di paki. Ora cu a pisa esaki, el a yega na mas di 1.3 ton di cocaina, cu un balor aproxima di 17.874.000 Dollar.
Autoridadnan Mericano no a divulga e nacionalidad di e tres detenidonan. Pero DEA di Merca lo keda encarga cu nan, y cu e investigacion.
E accion anti-droga aki na Puerto Rico, ta e di dos cu a tuma lugar den fin di siman. Pasobra Diasabra (siguiente dia), autoridadnan federal y local a detene tres venezolano kendenan a trata di drenta e isla cu 1.384 kilo di cocaina.
