ORANJESTAD (AAN): Diahuebs mainta un hoben di 18 aña a presenta dilanti Hues pa duna cuenta pa un delito cu el a haci na 2019, tempo cu e tabatin 15 aña.
E hoben B. a bisa Hues cu e mucha muher a bis’e tempo ey cu e tabatin 15 aña. Despues cu nan a tene relacion sexual, e mucha a bis’e cu e tabatin 12 aña.
DOS MUCHA TA TENE RELACION SEXUAL:
E hoben B. a presenta den Corte cu su padastro y sin abogado. El a bisa cu e no tabata sa cu e mester busca abogado y cu e kier pa sigui cu e caso. Fiscal a acusa B. di a abusa di un mucha muher menor di 12 aña y di a haci actonan inmoral cun’e entre Januari 2018 y Juli 2019.
Hues a haci B. un serie di pregunta pa asina haya claridad den e caso. Segun B. e no a conoce e mucha muher na Januari 2018, sino mas bien na Januari 2019.
Ta despues cu e mucha su mama a haci denuncia, el a distancia di e mucha cu tabata su chick.
Segun B. ta via Facebook nan a conoce otro. El a bisa cu ta e mucha muher a pidi pa ta amigo riba Facebook. E tempo ey e mucha a bis’e cu e tin 15 aña mientras cu B. tabatin 15 aña. Ta te despues e mucha muher a bin admiti y bis’e cu su edad di berdad ta 12 aña.
VIDEO DI RELACION SEXUAL RIBA SMARTPHONE:
Hues a mustra cu dia 8 Juli 2019 e mama di e mucha a haci denuncia. Segun e mama, 1 Juli 2019 e yiu muher a mande mensahe di Whatsapp cu e tabata Babysitting pero despues a resulta cu e tabata cerca B. na su cas.
Despues B. a hib’e cas. E mama a bay coba den smartphone di su yiu y a mira potret di B. sunu.
Segun B., e mucha tambe a manda potret sunu p’e, pues un proceso conoci como ‘sexting’.
Segun e rapport, e mucha muher a bisa miembronan di KZP durante interogacion cu e tabatin relacion sexual cu B.
For di e interogacion den Corte a sali na cla cu na Januari 2019 nan tabatin nan promer relacion sexual. Segun B. ta na tres diferente ocasion nan a tene relacion sexual.
Hues a bisa cu investigacion riba smartphone di e mucha muher, a divulga cu e mucha muher el a manda un cantidad di videonan di dje sunu y dirigi na B.
FISCAL SU OPINION:
Fiscal a bisa Hues cu e ta pone enfasis riba e aña cu e relacion mester a sosode. Na opinion di Fiscal, den e relato di KZP ta papia di 2018 tempo cu e mucha no tabatin 12 aña. Fiscal no ta haya esaki proba. El a bisa cu e hoben B. ta papia di Januari 2019.
Fiscal a sigui bisa cu e videonan di relacion sexual cu ta poni cu ta na Mei 2018 ta robez. Nan mester ta Mei 2019.
Fiscal ta haya legalmente proba cu entre December 2018 y Juli 2019 cu B., e tempo ey 15 aña a tene relacion sexual cu e mucha di 12 aña. Esaki ta algo serio. Fiscal a bisa cu e inmoralidad na Aruba ta un problema grandi. E caso aki ta serio pasobra a haci videonan y ora nan circula, bo no sa unda esakinan ta bay para. Fiscal ta haya cu B. mester tabata sa mihor. El a tuma B. na malo.
Pa cu e castigo, Fiscal a bisa cu e ta tene cuenta cu B. mes tabata menor di edad. Esaki ta haci e caso diferente pasobra e mucha tabatin 12 y B. 15. Fiscal tambe ta tene cuenta cu B. a cambia su bida.
El a exigi castigo condicional di 1 luna di prison cu tempo di prueba 2 aña. Fiscal a bisa cu esaki ta un aviso.
Hues a bisa cu e ta bay studia e caso y 28 October 2021 lo tin sentencia 8:15’or di mainta.
