E impacto di turismo cu no ta keda den hotel ta interesante - *Promocion pa reserva pa vuelo awor pa evita aumento gastonan - *Prijs di petroleo ta instabilidad nobo den sector turistico mundial
ORANJESTAD(AAN)—Ora papia di turismo, ta papia di un union di diferente sector cu hunto ta forma e industria cu ta basa riba e anhelo di hende pa conoce otro parti di mundo y sigur pa bandona e bida diario.
Si inicialmente turismo tabata un posibilidad solamente pa persona cu entrada halto, paketenan especial crea dor di e diferente ramonan den turismo, a haci posibel pa un grupo mas grandi di ciudadano por disfruta di nan vacacion como turista.
Esencial den mundo di turismo ta transportacion cu ta e crea e posibilidad pa un hende bandona su circulo diario.
Transportacion ta depende di producto petrolero y prijs pa transportacion ta subi y baha cu cada fluctuacion di prijs pa productonan petroleo.
Sinembargo, servicionan cu ta parti di turismo en general, tambe conoce aumento di prijs si productonan petrolero aumenta ya cu nan mester ofrece e cliente tur comodidad cu entre otro coriente ta brinda.
Cuminda cu ta wordo sirbi na e turista, mantencion y limpiesa, servicio di transportacion local y asina por continua cu e lista largo, tur ta parti di e planificacion financiero di tur participante den sector di turismo, cu ta uno di e fuentenan mas importante di entrada na nivel mundial.
Aruba como isla di turismo, por a sinti directamente e impacto di caida di turismo, cu no solamente ta na top di e industrianan mas productivo di mundo, pero tambe na top di e industrianan cu mas riesgo mundialmente.
Aruba cu basicamente no conoce condicionnan peligroso cu naturalesa ta presenta, manera resultado dramatico di temporada di horcan, na 2020 a wordo sorprende pa e impacto di Covid-19 cu a destrui industria di turismo rond mundo.
Ora na hopi pais e pandemia mas o menos a parce controla, miedo a sigui existi sigur ora e variante Delta a haci su entrada.
Miedo pa biaha ta keda uno di e obstaculonan te awe na un nivel mundial y organisacionnan turistico rond mundo ta duna hopi atencion na e esfuersonan pa kita miedo pa biaha.
Si na 2020 tabata bisto cu e temporada di turismo lo no tabata productivo, tabata hopi speransa cu na 2021, e situacion lo a mehora.
Poco poco paisnan a cuminsa habri nan porta pa turismo y tur parti di loke ta importante pa turismo manera recreo.
E impacto di prijsnan di petroleo ta un shock nobo cu mundo di turismo mester atende.
Companianan aereo, cu a sufri considerablemente di Covid-19, y cu pa loke ta trata Aruba ta e transportacion mas importante di turista, awe ta wordo confronta cu e peliger cu e prijsnan di productonan petrolero ta sigui subi manera a wordo pronostica y a bira realidad ayera.
DIARIO a haci uzo di su contactonan den exterior y a ricibi e informacion cu mas y mas companianan cu ta regla biahe pa turistanan, ta promove pa awor reserva y paga e prijsnan cu companianan aereo ta ofrece.
Agentenan di viahe ta esforza nan mes pa evita cu e produccion di turismo pa temporada halto 2021-2022 no wordo alcansa.
Na Aruba, manera informacionnan ricibi ta indica, mester tene na consideracion cantidad di negoshi cu no ta wordo considera hotel pero cu tambe ta haya entrada di turistanan cu ta keda den cambernan cu nan ta ofrece.
Expertonan ta indica na DIARIO cu ta por papia di inflacion, ya cu prijsnan di gasolin y otro productonan petrolero ta sigui subi y tur negoshi ta wordo forsa pa ahusta nan prijsnan na e loke nan mester paga pa tur servicio cu nan empresa ta uza.
Na momento cu mundo a pensa cu control di Covid-19 pa medio di vacuna lo a honra cierto expectativanan, incertidumbre ta wordo provoca dor di e prijsnan di petroleo cu ayera a sigui subi y por alcansa record prome cu 2021 yega na su fin.
Sector turistico, sinembargo, ta conciente cu su prijsnan mester keda competitivo pero con biba cu perdida despues di Covid-19, ta e pregunta grandi!
Delta Airlines sigur tin atencion di DIARIO, cu ta en busca di informacion di tur compania cu ta parti di e panorama turistico di Aruba.
