Clifford Rosa a splica pakico:
ORANJESTAD (AAN) – Den e marco di celebracion di 13 aña di Fundacion Rancho, a cuminza cu un programa desde dia 20 di April, cu ta e dia di celebracion aniversario, cu nan a organiza un simposio cu a resulta hopi bon. Den entrevista cu DIARIO, Presidente du Fundacion Rancho, Clifford Rosa, a splica cu nan a sigui cu otro charla tocante e historia di musica di Vallenato. E charla tabata na encargo di Freddy Gonzalez Subiria, ken a haci un investigacion na La Guajira, Colombia, y tambe riba e nucleo cu e musica aki, tin na Aruba.
Rosa a menciona cu na Aruba tin hopi hende descendiente di La Guajira, y e musica Vallenato ta algo patrimonial pa Colombia, pero tambe pa hendenan aki na Aruba. Locual e tin di haber cu Rancho ta e waf, unda e navegantenan cu tabata yega y con nan musica a move di un caminda pa otro. Rosa a subraya cu e musica aki a drenta Aruba via di e waf. E ta corda cu e Vallenato a yega Hotel Central, pues, e tin hopi vinculo den e bario. Pakico? Pasobra tambe tin hopi Colombiano bibando den e bario, descendiente di hende for di Santa Marta of La Guajira.
Esey ta algo tradicional, cultural, cu mester investiga mas riba dje, segun Clifford Rosa. El a agrega cu esaki pa Fundacion Rancho ta interesante y importante, pa mira e lazonan di similaridad cu tin entre La Guajira y Aruba. Pues, no solamente e cabrito cu nos ta gusta come, of e pisca, pero tambe e musica.
Esaki ta algo no solamente Colombiano pero di Caribe, Clifford Rosa a comenta y acentua cu pesey pa e Fundacion esaki ta asina importante. El a menciona otro tiponan di musica cu tambe tin influencia na Aruba, manera Bolero, Salsa, Danzon, y e manera con ta crea un fiesta bunita unda hendenan ta balia.
