Parti 1
Cada deporte na Aruba tin su historia y tambe e personanan cu a trece e deporte na Aruba.
Si nos skirbi di futbol nos mester menciona Dominee Eijbers di Kerki Protestant cu a introduci futbol na Aruba. Nos por sigui menciona cu Cliff Monroe, un empleado di Lago” a introduci basketball pafor di Colony.
Den Baseball no ta sigur ki tempo y ni ken a introduci baseball na Aruba. Loke si por bisa cu baseball a yega na Aruba danki na influencia di Venezolanonan y Dominicanonan cu tabata bishita Aruba regularmente.
Den ultimo añanan di 1930 a forma un ekipo di Baseball dirigi pa Raul Aparicio ( subrino) di Luis Aparicio. E nomber di e ekipo tabata yama “Venezuela” Nan tabata e prome ekipo uniforma pero no sigur no e prome hungadornan di baseball na Aruba. Tabata gruponan di piscadornan y navegantenan di barco di fruta ta esnan cu a hunga e prome weganan di baseball na Aruba. E weganan tabata tuma lugar ariba un tereno habri na Companashi.
Di e Arubiano cu a hunga baseball tabata Feliz Tromp, un trahador cu a bay traha na Cuba y Hendrik Arends cu tambe a traha na Cuba ta figura den e prome Arubianonan cu a hunga baseball na Aruba.
Un otro pionero di Aruba su baseball ta Nestor “ Pantin” Guerrero, un persona naci na Republica Dominicana cu tambe tabata hunga ariba e tereno na Companashi.
“Pantin Guerrero” tabata hunga pa e ekipo di Botica San Lucas” y despues pa ARTRACO. Despues cu Pantin Guerreo a retira como hungador activo a sigui maneha algun ekipo di baseball, incluyendo ekipo di Schutters Arubiano na Mariniers Kazerne.
Na San Nicolas mientrastanto tambe tabata tin weganan di baseball entre imigrantenan Venezolano y Dominicano. E tereno di bala tabata den Pastoor Hendrikstraat dilanti di ijsplant bieu conoci como “ EMM Park” un tereno cu tabata usa pa Inglesnan, trahadornan di Lago, pa hunga cricket. Eventualmente a forma un ekipo cu tabata yama “El Capitan” ( un marca di kerosine) y asina a tuma lugarnan partido cu tabata hala hopi fanatico entre ekiponan “El Capitan” y “ Venezuela".
Fuente: Historia di Baseball Aruba, e Prome añanan. skirbi pa Clyde R. Harms
Compila pa Roberto Croes
Nos Historia Nos Herencia
