ORANJESTAD (AAN): HIAS Aruba y Fundacion Telefon pa Hubentud Aruba a anuncia cu nan a uni forza pa reduci e riesgo di violencia contra hende muher y hende homber y pa promove masculinidad saludabel, cu un proyecto na scolnan.
Durante un conferencia di prensa Diamars mainta, Brian Verschuur di HIAS a splica cu masculinidad saludable ta un serie di actitud y comportacion adopta door di un persona, cu ta promove e bon comun, tanto individualmente como pa e comunidad.
El a splica cu e colaboracion aki ta basa ariba e extenso experiencia cu Fundacion Telefon pa Hubentud Aruba tin den implementa proyectonan similar na scolnan primario riba nos isla, tal como e programa di “Prevencion di Termento na Scol” (Stop Termento).
“Danki na fondo proporciona door di e Bureau of Population, Refugees, andMigration (BPRM), e dos organizacionnan aki a desaroya un proyecto piloto yama “I Stopped It” (Ami a pare)”.
E proyecto aki ta preventivo di naturaleza, y ta trata di para violencia entre mucha homber y mucha muher. E proyecto ta atende cu e problema di violencia, e trato entre mucha homber y mucha muher, igualdad, y ta promove masculinidad positivo den 8 scol primario den 8 distrito riba nos isla, según Verschuur.
Kimberly de Cuba di Telefon pa Hubentud tambe a hiba palabra y a splica cu “I Stopped It” a cuminza oficialmente den luna di Februari. Te cu awor 6 di e 8 scolnan primario a ricibi e proyecto aki.
Según de Cuba, e reaccion preliminario pa lo cual ta e proyecto ta mustra di ta hopi positivo cu studiantenan, demostrando un comprension amplio riba e tematica.
“Un estudiante a remarca:“comunidad ta bisa cu hende muher mester obedece, momento nan no ta haci esaki, hendenan homber tin e tendencia di uza violencia”. Docentenan tambe ta haya e proyecto aki uno cu ta hopi beneficioso. Un docente a menciona: “esaki ta un bon iniciativa, mi ta kere cu e studiantenan por beneficia masha hopi di e tipo di proyectonan aki”. Nos tin e speranza cu mas scol lo tin e opinion aki di e proyecto, según de Cuba.
El a sigui bisa cu “I Stopped It” ta stimula prevencion di violencia, cu ta un di e puntonan importante di e ‘Beleidsvoornemens’ di Minister di Husticia y Asuntonan Social.
Adicionalmente, Fundacion Telefon pa Hubentud Aruba ta recolectando data riba e efectividad di e proyecto, pa asina determina si “I StoppedIt” ta presenta suficiente resultado satisfactorio pa por sigui cu e proyecto aki den otro scolnan riba nos isla.
“Nos ta masha agradecido na tur persona cu ta forma parti di e proyecto importante aki y spera cu via di “I Stopped It” nos lo por logra tin un impacto positivo den e bida di nos hobennan. Asina aki e hobennan por biba ariba un Aruba mas inclusivo y cu menos violencia, según de Cubs.
El a sigui bisa cu creacion y implementacion di “I Stopped It” ta den cuadro di e ‘kenniscentrum’ di Fundacion Telefon pa Hubentud Aruba. Despues di 24 aña di existencia Fundacion Telefon pa Hubentud Aruba como un ‘kenniscentrum’ ta compartiendo y exportando conocimiento cu organizacionnan gubernamental y no-gubernamental local y den region.
