ORANJESTAD (AAN): Het Cultuurfonds Caribisch Gebied (CCG) a lansa exitosamente su iniciativa pa 2025 cu un reunion dinamico di kick-off plan di aña, tene na Corsou.
E reunion aki a uni miembronan di directiva, consistiendo di representantenan di e seis islanan di Reino Hulandes. Esaki ta un evento anual cu ta sirbi como un base pa colaboracion, trata desafio comparti, y fortalece e compromiso di e organisacion pa promove y preserva e herencia cultural di region di Caribe Hulandes.
E reunion di 2025 tabata destina pa establece e presupuesto anual basa riba e necesidadnan di oficina, pa asina yuda peticionarionan na un manera optimo. Ademas, tabatin ‘brainstorming’ riba un plan di varios aña den e contexto di reposicionamento di e fondo den e sistema nobo di fondonan publico y priva cu ta wordo ofreci awendia riba e islanan.
Cu e manera strategico aki, e fondo kier adapta na e structura di financiamento cu ta cambia y atende mihor e necesidadnan di stakeholdernan cultural den e region.
Sr. Lionel Janga y Sr. Raffy Kock, Presidente y Vicepresidente di Het Cultuurfonds Caribisch Gebied, a enfatisa importancia di e reunionnan di colaboracion durante nan discurso di introduccion.
“E reunionnan aki ta duna nos e oportunidad pa sigura cu e bosnan diverso di nos islanan ta wordo scucha y cu nos metanan colectivo ta ser logra. Ta esencial pa nos keda firme den nos mision pa preserva y promove e rikesa di nos identidad cultural, y nos lo sigui stimula e intercambio entre e seis islanan di Reino Hulandes,” segun Lionel y Raffy.
Un parti importante di e reunion tabata un serie di sesion di intercambio di idea cu a enfoca riba desaroyo di strategianan practico pa trata e desafionan identifica. Participantenan a comparti ideanan y posibel solucionnnan, enfocando riba simplifica e proceso di aplicacion pa subsidio, mehoracion di esfuerso di reach-out y crea caminda nobo pa preservacion cultural y patrimonio intangibel.
E combersacionnan aki a pone base pa pasonan concreto cu CCG lo implementa durante e aña cu ta bini pa yuda stakeholdernan cultural na un manera mas efectivo.
Mientras cu Het Cultuurfonds Caribisch Gebied ta sigui defende e preservacion y promocion di e herencia cultural unico di e region, e resultado di e reunion aki ta sirbi como un recordatorio fuerte di e importancia di colaboracion y innovacion den desaroyo cultural.
E organisacion ta keda compromete pa sostene iniciativa cu ta fortalece identidad di e region y mesora stimula crecemento y sostenibilidad pa futuro generacionnan.
