*E lo conta con el a bira sobreviviente di cancer danki na Dios y Arte
ORANJESTAD (AAN) – E artista plastico Jo-Ann Kock-Ridderstap, ta bay presenta na Museo Arkeologico, diasabra proximo, durante celebracion di Dia di Betico.
Den entrevista cu DIARIO el a splica cu e ta gusta pinta cu acrylic y e ta un artista versatil cu ta gusta pinta diferente tipo di arte, y e ta wordo inspira, mas tanto, pa e naturaleza di Aruba.
E ta bay presenta un arte psicologico cu ta yuda e persona si e ta sinti depresion, stress, ansiedad. E arte aki ta yuda sali for di e situacion, e ta traha riba e sub-conciente, y den e aspecto con bo curpa ta reacciona riba e mundo pafo.
“E ta traha den bo paden y ta traha cu bo neuronanan pa bo sali di e depresion y di locual cu bo ta sinti. E ta yuda tambe den e salud, pasobra tin hende cu mi a experiencia cu tin dolor di curpa, pero e ta un practica. Mi ta duna e tools pero bo mes, mester sigui experimenta cu ne na cas”, Jo-Ann a señala.
El a relata cu el a pasa den un experiencia personal, como sobreviviente di cancer. “Mi por bisa, y p’esey mi ta stima arte hopi, cu arte a yuda mi pa mi por a pasa e proceso, e fase aki. E tabata diez aña pasa cu mi a wordo diagnostica cu leukemia, full mi tratamento tabata na Hulanda, anto un mucha muhe academico a cuminza pinta den mi camber, door cu mi ta cera, door cu ora bo tin leukemia bo no por cana pafo. Mi a keda seis luna na Hulanda, y full e periodo eynan mi tabata pinta, y danki na Dios cu mi por a sana, pasobra ora mi tabata hayando chemotherapy mi tabata pinta. Mi no ta pensando cu mi ta tumando chemo, of cu mi ta pasando un periodo malo”, Jo Ann a comparti.
El a subraya cu e arte ta salud, pero solamente e persona mester ta persistente. Pesey e kier a bin cu e maraviyoso experiencia y mensahe aki, pa yuda otro personanan cu su ehemplo. El a invita pueblo di Aruba, mucha, hoben, adultonan. E ta den e edificio di Museo den e parti di glas ariba, y lo bay ta for di 10 pa 10.30 or di mainta y atardi di 1’or pa 2.30 or. E ta pidi un contribucion chikito pa cubri e materialnan.
