Awe berdad di escandalonan cu a muri na mita caminda ta presenta --- Ni Parlamento di Aruba ta bon na haltura di Sasakiplan y Bo Aruba --- 25 Miyon, WEB, Utilties, y destinacion di e placa cu a cambia na final
ORANJESTAD(AAN)- Kico a pasa cu placa di Aruba? Esaki ta e motibo di investigacionnan di DIARIO cu ta continua cada bez cu mas motibo.
E situacion financiero actual di Aruba ta culminacion di gobernacion di Aruba, caminda hopi pregunta a drenta historia sin contesta.
Kico a pasa realmente cu placa di Aruba? Pakico un pais cu mira un supuesto explosion financiero, finalmente ta den problema financiero serio?
Rapportnan ta duna contesta riba tur pregunta. Rapportnan cu a bandona publicidad sin cu Pueblo a wordo bon informa di nan contenido, cu na un forma of otro a wordo pusha den e mundo di olvido.
Hunto cu expertonan DIARIO ta tras di tur rapport financiero di Aruba cu por duna indicacion di e historia financiero di Aruba.
Expertonan cu a splica DIARIO cu tin dos ruman cu mester bin splica Aruba, con den proyectonan cu ta parce morocho, abuso a wordo comete contra bienestar di Pueblo.
“Henny y Mike Eman mester bin duna Pueblo di Aruba tur informacion riba loke a pasa cu placa di Aruba durante nan gobernacion,” a wordo trece dilanti dor di informantenan cu a mustra con na un pais manera Aruba, por a trapa riba e sistema legal.
E forma cu a atende cu placa di Pueblo oficialmente a wordo considera iresponsabel y contra regla dor di instancianan manera Algemene Rekenkamer Aruba, cu a produci dos rapport cu ta splica sigur e gobernacionnan di Henny Eman y Mike Eman.
E final di gobernacion di Henny Eman, cu na un edad relativamente tempran a baha como cabesante di AVP, ta bini dilanti den e rapport di Algemene Rekenkamer Aruba cu a a hiba cuatro miembro di Gabinete Henny Eman dilanti Huez.
Den e desaroyo aki hopi informacion a bini dilanti pero a bira discusion politico a base di e forma cu a atende cu e asuntonan.
Contenido real di e rapportnan tanto di e Fondo Desaroyo Nobo San Nicolas, nunca ta completamente conoci pa Pueblo di Aruba mescos cu e rapportnan cu a wordo traha riba Gobernacion di Mike Eman, e Prome Ministro di Aruba durante scandalnan cu a rementa den Corte di Aruba, pero ainda no ta asumi su responsabilidad como cabez di e gobiernonan cu a mira e scandalnan di entre otro Benny Sevinger y Paul Croes.
Informantenan a splica DIARIO con tanto den e Fondo Desaroyo Nobo San Nicolas como den e proyectonan di Bon Aruba, Parlamento di Aruba a perde su importancia den control di bienestar di Pueblo y sigur den placa di Pueblo.
Den ambos caso por papia di Parlamentonan cu un mayoria cu tabata sostene e partido berde na mando y cu no a ehecuta nan Derecho di Budget pa controla kico ta pasa cu placa.
Den esaki por topa pues cu casonan cu den e rapport di Fondo Desaroyo Nobo San Nicolas, ta wordo yama contra ley, mescos cu ta pasa cu e forma cu Mike Eman a firma Citgo y a haya 1.6 Biyon di Parlamento di Aruba cu mayoria di AVP pa ehecuta Bo Aruba.
“Splica Pueblo con Utilities a percura pa 25 Miyon pa un prestamo den cual WEB tabata envolvi pero e placa a cambia di destinacion,” informantenan a bisa DIARIO na 2021, ora e bom financiero di Aruba a spat den cara di comunidad!
