Sindicatonan di Gobierno mester splica nan entrada na contribucion --- Cuanto placa sindicatonan ta perde si trahadornan tin menos entrada? ---- Por declara sindicato di gobierno bancarota mescos cu empresa priva?
ORANJESTAD(AAN)- Sindicatonan cu ta representa trahadornan di Gobierno awe ta duna prueba cla na comunidad cu nan no tin ningun sentido di responsabilidad.
E realidad di e situacion cu ta presenta na Aruba, caminda den un situacion mundial sumamente dificil, sindicalistanan ta menasa di crea dificultad laboral y asina intrankilidad na Aruba, ta entrega prueba cu algo ta completamente robes.
Kico a pasa Aruba? Pakico Aruba a cay den un abismo na 2020 hunto cu henter mundo?
Aparentemente Aruba tin sindicalista cu ni sikiera ta na haltura cu na 2020, mundo a wordo ataca pa un virus cu a mata, cu a sembra dolor, a sembra angustia y a destrui bienestar di hende.
Aparentemente Aruba tin sindicalista cu ta considera nan mes dirigente y ni sikiera tabata na haltura cu na 2020 mundo moderno a basha abou y Aruba mester a cera su portanan.
Prome cu Prome Ministro Evelyn Wever-Croes mester a tuma e decision historico di lockdown Aruba, DIARIO tabata atende cu e ciudadanonan di Aruba, cu ta traha na hotelnan, cu cada rato tabata bira mas bashi.
DIARIO mester a atende cu trahadornan den tur sector na Aruba, cu a perde entrada.
Tin negoshi cu nunca mas por a habri nan porta. Tin negoshi cu a stop di existi. No na Aruba so pero rond mundo pa motibo di un virus.
Pero aparentemente e sindicalistanan di Gobierno no ta na haltura di esaki. Nan no a comprende, cu ainda e peliger no a pasa y cu na Europa paisnan ta lockdown awe.
Prome cu nos yega na conclusion, nos kier analisa cierto factornan manera costumber.
Na prome lugar nos mester haya un contesta pa e hecho, unda mester protesta contra kende of kico pasobra Covid a haci su entrada y a destrui economia mundial pero pio ainda bida di hende.
Unda nos mester bay reclama of protesta? Kende ta dirigi mundo? Kende a permiti loke a pasa? Hende? Of un poder mas grandi cu hende?
Te aki nos a yega cu e parti aki pasobra nos si ta na haltura cu tin asuntonan cu ta exigi pa hende baha cabez y reconoce realidad.
Nos ta sigui pa otro parti di nos analisis. Kico pa sindicatonan di Gobierno ta nifica, si trahadornan tin menos entrada of ta sin entrada? Con ta haci cu e contribucion?
Na cual momento sindicatonan, cu ta un empresa riba nan mes, ta dicidi cu e miembronan no ta paga contribucion mas?
Kico ta pasa cu e dirigentenan di sindicato cu ta depende di placa cu nan ricibi na contribucion? Con menos salario di miembronan di sindicato ta baha entrada di sindicato cu mester paga luz, awa, etc. etc. mescos cu Gobierno mester cubri su gastonan; empresanan priva mester cubri nan gastonan y ciudadanonan mester cubri nan gastonan?
DIARIO ta analisando cifra pero mester di cierto informacionnan directamente for di seno di cierto sindicatonan cu tambe tin nan afiliacion politico.
Placa, placa, placa. Problema manera por mira na paisnan comunista caminda e lider ta core den auto mas grandi cu cas di e trahadornan.
Pero ya mester tin diferencia den bida.
Pa conclui ainda nos falta algun contesta esencial pues. Contra kende nos mester protesta contra e e atake di Covid-19?
Si nos protesta contra Covid-19 algo ta pasa of nos protesta ta causa mas aglomeracion y mas caso?
Finalmente ta cuanto placa tin na wega pa sindicatonan di Gobierno?
Un ultimo pregunta. Sindicato por wordo declarta bancarota mescos cu empresanan priva?
