Henny Eman Boulevard lo ta un recordatorio di liderazgo cu principio

Minister Wendrick Cicilia:

ORANJESTAD (AAN): Diamars atardi, dia 6 di januari, Gabinete AVP-FUTURO a honra peticion di Stichting Henny Eman, door di nombra un di e camindanan principal di Aruba na nomber di Henny Eman d.f.m. Henny Eman tabata mas cu e prome Prome Minister di Aruba.

E tabata un estadista forma pa historia, pa conviccion, y pa un creencia profundo den Aruba su derecho y habilidad pa traha su propio futuro. Naci den un famia cu tabata e pionerionan di e vision di Status Aparte, Henny Eman a carga e responsabilidad ey cu humildad, inteligencia y determinacion.

Minister Wendrick Cicilia, durante su speech a indica cu ta importante pa celebra tur loke Henny Eman a nifica pa Aruba. Un dicho cu Minister Wendrick Cicilia por conecta na Aruba ta “If I can see further then other is because I’m standing on the shoulders of giants”, diamars Aruba a celebra un gigante cu a nifica y dedica hopi pa e desaroyo di Aruba. E rotonde di Mahuma te cu e rotonde di dilanti di Sun Plaza lo hiba e nomber di Henny Eman Boulevard.

Henny Eman a compronde cu gobernacion fuerte ta rekeri tambe un infrastructura cu ta pensa pa dilanti y un posicionamento internacional. Na 1987, durante su liderazgo, Aruba a yama bonbini na pre clearance di Merca, un paso visionario cu a fortalece nos sector di aviacion, mehora e eficiencia di biahe, y a reenforsa Aruba su rol strategico como un hub regional, beneficionan cu ta sigui sirbi nos pais te dia di awe. Turismo di Aruba no ta un casualidad, ningun modelo economico exitoso ta nace di casualidad, sino di un arkitecto visionario.

“Door di nombra e boulevard aki na Henny Eman, nos no ta solamente honrando un ex-Prome Minister, pero tambe un herencia di liderazgo ancra den servicio, resiliencia y vision. Su manera di lidera ta sigui ta un referencia pa esnan manera mi cu, for di un generacion nobo, ta asumi e responsabilidad di sirbi nos pais”, tabata expresion di Minister Wendrick Cicilia.

Cu Henny Eman Boulevard para como un recordatorio duradero di loke liderazgo cu principio por logra, y cu e inspira futuro generacionnan pa sirbi Aruba cu dedicacion, curashi, y integridad