Helicopternan nobo di Warda Costa Caribe Hulandes ta operacional

ORANJESTAD (AAN): Warda Costa Caribe Hulandes a anuncia cu nan a cera un contract nobo pa helicopter y a tuma nan den servicio.

 Esaki ta en conexion cu e contractnan cu a vence fin di aña pasa di e compania di ‘lease’ Draken, Warda Costa a traha ultimo añanan duro pa cera un contrato nobo pa e helicopternan.

E dos helicopter tipo Augusta Westland, a base di un contract temporal, a wordo entrega pa e compania Bristow Helicopters Limited. Cu e contract temporal cu Bristow, Warda Costa tin su capacidad di vuelonan pa su servicio. Di e dos helicopter, na e momento aki, un tin e colornan di Warda Costa, y e otro tin e colornan di e compania Bristow. Pa mita di 2023, ambos helicopter lo luci colornan di Warda Costa. E helicopternan lo eherce vuelonan durante e 10 añanan benidero pa Warda Costa.

Segun informacionnan di Warda Costa, e tipo di helicopter AW-139, ta keda mescos, tanto den e contract temporal como den e contract nobo. E sensornan di e helicopternan nobo si ta miho. Tambe esnan nobo tin medionan di comunicacion di calidad halto abordo y nan ta miho ekipa pa accionnan di buskeda y rescate.