WILLEMSTAD: E siman aki, e Helicopter di Wardacosta di Caribe Hulandes a haye obliga na lanta vuelo pa bay duna asistencia medico na turistanan.
Esaki a socede riba isla di Curaçao, ora cu den oranan di mainta, Rescue and Coordination Center (RCC) di Wardacosta a haya informacion cu algo a pasa cu dos turista cu tabata subiendo Christoffelberg na e isla.
Nan a cay den un pida basta halto, y a yega varios meter abao. Cuerpo di Bombero cu a bay eynan pa duna yudanza, a indica cu tabata dificil pa saca e hendenan ey for di e pida ravina ey.
E Helicopter di Wardacosta a bay na Christoffelberg, y cu winch a baha un oficial di Wardacosta, cu a bay mara e turistanan y asina a subi nan abordo di e Helicopter cu a keda bula den halto.
Despues e Helicopter a move pa Aeropuerto di Hato, unda un Ambulans tabata sperando riba nan pa asina transporta nan pa Hospital pa ricibi tratamento medico.
