WILLEMSTAD: Diadomingo banda di 10:00 am, alarma a worde bati na Centro di Rescate di Guardacosta di Caribe Hulandes (RCC) pa solicita yudanza pa baha un persona for di St. Christoffelberg na Curacao.
St. Christoffelberg ta e sero di mas halto cu tin riba e isla. E yamada a indica cu tin un dama herida riba e sero y no por bahe normal mas, pues un rescate cu Helicopter lo ta deseable.
E dama di 38 aña di edad tabata casi yegando na e top di e sero, ora cu el a twist su rudia. Un Park Ranger encarga cu Christoffel Park a logra di localiza e dama riba e sero, y a yuda den e coordinacion tambe.
RCC a saca e Helicopter di Patruya di Guardacosta, esta e AW-139 cu a bula bay den direccion di e indicente. Esnan abordo a prepara pa un acto di ‘helicopter hoist’ pa hisa e dama for di e sero te den e Helicopter.
Esaki a bay toch na un forma perfecto, y unavez cu e dama tabata den e Helicopter, nan a move pa e punto di sosten di Guardacosta na Aeropuerto di Hato, unda un Ambulans a tume over pa hibe Hospital na e isla.
