Dr. Wilmer Salazar: -*No tin un guideline pa preveni di haya HP
ORANJESTAD (AAN) — Pa finaliza e entrevista cu Docter Wilmer Salazar, tocante e tema di “Helicobacter Pylori”, a elabora riba dos pregunta hopi importante:
- Un persona cu a haya tratamento contra HP, cu bon resultado, toch e por haya e bacteria bek?
- Tin algun forma di prevencion di HP?
“Un persona cu a haya su dosis di tratamento pa Helicobacter Pylori por wordo re-infecta un biaha mas. E situacion ta e adkisicion di cierto condicionnan di e bacteria cu ta bira mas patogenico; mas dañino. Otro aspecto ta, cu tin diferente skema di tratamento. Un ta yama triple terapia cu antibiotica y of terapia di cuater antibiotica. E eleccion ta e triple di cuater, dependiendo con e condicion di e persona ta, si a haya problema den su salud di stoma, antecedente genetico di famia cu cancer di stoma of cancer di tripa, entre otro.
Mester wak si e persona cu ta hayando antibiotico lo por ta resistente na un of dos antibiotico; e ta un problema cu ta pasando actualmente, na unda ta apareciendo e bacteria Helicobacter Pylori resistente na un of dos antibiotico di e tres of cuater antibiotica cu ta wordo duna di un solo biaha. Corda cu antibiotica lo por dura diez pa 14 dia. Esaki ta un fenomeno cu ta wordo observa aworaki, di e aumento di resistencia na cierto antibiotico pa e tipo di bacteria aki cu cada biaha ta cambiando su mutacionnan of su material genetico pa adkiri mas resistencia.
Docter Salazar a reitera cu e tratamento no ta un so, pero un grupo di antibiotico triple, cuater, of mas dependiendo di con e docter ta considere, si tin factor di riesgo mas extenso, si e persona a haya infeccionnan ripiti di HP, y pesey ta importante pa ora e docter wak cu ainda e pacient no a cura, of si a cura pero a reincidi cu e mesun sintoma, haci e diagnostico via endoscopy, na unda nan ta hinca un tubo den su garganta via stoma, y a base di esey nan ta tuma un par di muestra cu ta yama biopsia di material di e mucosa gastrico, pa detecta: 1: si ainda tin e bacteria of si ta existi algun otro tipo di situacion; 2: cu nan por haci un cultivo di e bacteria y haci un antibiograma. E ta hopi importante pasobra e ora ey mester sa si e persona a crea resistencia pa antibiotico door di e bacteria y cual nan ta. Esey ta lo ideal. Y si ta un persona di riesgo halto cu e docter pensa cu e por desaroya un ulcera gastrico of un cancer di stoma, anto tin cierto maneho pe. Esaki ta door di un specialista; un Gastroenterologo. Nan tin diferente sorto di maneho; por ehemplo, Europa tin su maneho, Merca tin un otro, y dependiendo di e experiencia di e docter”.
Tin manera pa preveni HP?
“Te na e momento aki, no tin ningun guidelines pa preveni e infeccion pa Helicobacter Pylori. Sinembargo, mantene un nivel higienico-sanitario personanan, hiba un estilo di bida sano, evita humamento, limita consumo di alcohol, haci movecion, baha stress, incorpora den bo dieta alimentonan probiotico (berdura, fruta, nuts, y tee, y regularmente tuma probiotico manera kombucha, yogurt, kefir, y baha e consumo di carni cora, lo yuda bo tene un shield saludable na bo curpa. Y corda semper consulta na bo docter ora bo tin algun problema di salud”, Docter Wilmer Salazar a conclui.
