Heintje Ras ta keda 100 dia den scuridad di Mina di Fosfaat

ORANJESTAD (AAN): Diasabra atardi e momento a yega pa Heintje Ras a drenta oficialmente den e Mina di Fosfaat den Colony, pa asina cuminza cu su hazaña di 100 dia eybao cu e meta pa recauda fondo y haci un Museo di Antiguedad Aruba bira realidad.

   Net prome cu el a baha, Heintje a gradici tur esnan presente, e.o. su miembronan di Team Boluntario, Famia, Amigonan, Pastoor Andres, personal di Cuerpo Policial, personal di Cuerpo di Bombero, Paramediconan di Ambulance.  El a bisa cu esaki ta historico, cu un solo meta, ta pa inverti den tereno pa un Mega Museo cu ta bira esun mas grandi di Aruba y Caribe.

   Papa Dios ta mi guia, mi ta cana tras di dje.  Pastoor Andres cu su bendicion mi lo drenta sin wak patras, y ta bay den nomber di Papa Dios y cana tras di su yiu Hesus Cristo.  Mi no ta bay defrauda mi yiunan Alzachary y Alzachayla, mi pueblo di Aruba.  Realiza y compronde kico ta e caus.

   El a gradici tur hende, su amistadnan, y ora el a drenta el a splica cu esaki ta bay yuda pone Aruba su nomber na grandi den e Guinness Book of World Records.  Importancia ta e meta final di e hazaña pa logra su meta, pues si bo tin un soño, para firme y lucha pa bo realiza esey.

   Prome cu el a baha, el a desea tur hende Bon Pasco, y Feliz Aña Nobo.

   Esey ta debi cu el a baha den e Mina riba Diasabra 2 October 2021 pa 5:00 pm.   Pa e logra su hazaña di 100 dia, e lo tin di sali bek te Diadomingo 9 di Januari 2022 despues di 5:00 pm.

   Tuma nota cu ora e pasa 70 dia, ya caba el a kibra e record.  Pero e kier avanza e record te na 100 dia.

   E lo conta cu un team special, cu lo yuda, guia, como tambe controla su salud durante e hazaña aki.  

   E ta un ex-tour guide:  Heintje Ras tin varios aña caba ta organiza tours den e mina di fosfaat, tanto pa local como turistanan. E ta kere cu muchanan y nos hendenan tin derecho di sa nos historia. Ras tambe ta fungi como bombero y e ta un coleccionista di artefactonan hopi antiguo y historico.

   E tambe tin un coleccion di autonan clasico. Su cas a bira un 'cas-museo' y riba 3 di mei 2019, Ras a funda 'Fundacion di Museo di Antiguedad Nos Bieunan Aruba, pa motibo cu su cas a bira chikito, e kier recauda fondonan pa yega na su edificio pa habri un Mega Museo Aruba. 

  Nan ta spera di por conta cu apoyo di comunidad di Aruba, specialmente comerciantenan, den e hazaña aki, pa asina logra e fondonan pa realiza un Mega Museo Aruba.

   Ras mes a conta cu e hazaña di 100 dia tin un storia su tras, Guinness Book of Records tin un serie di exigencia cu e mester cumpli cune y e ta cla pa enfrenta y cumpli cu tur. Un di e exigencianan ta cu na momento cu e drenta e buraco di e mina di fosfaat e no por sali pa 100 dia. E no por weita solo, ni un tiki di su claridad, tampoco Luna. No por tin coriente, candela, ni lampi di kerosin y tampoco ningun tipo di Wi-Fi y comunicacion.

   Ras ta gradici tur boluntario y team cu ta su tras, cu ta kere den dje y lo keda sostene durante e 100 dianan aki.  E ta contento tambe cu Departamento di Cultura di Aruba (DCA) ta dunando 100% di nan sosten tras di e proyecto aki.

   Prome cu el a baha, el a pasa braza tur hende, gradici pa e apoyo, y despues pa exactamente 5:00 pm el a baha e trapi.  El a baha cu su dos yiunan Alzachary y tambe Alzachayla cu lo keda cune 10 dia eybao.  Y tambe un grupo di boluntario cu a yuda baha cu caha, ice-jugs, etc.  Exito Heintje!

   Si bo kier haci donacion, bo por haci esaki na Cuenta RBC Bank #77000001000257292.

   Riba Diadomingo, DIARIO a haya permiso pa baha bay bishita Heintje un rato, y esaki por lesa y mira mas di dje riba un otro pagina.