Heintje Ras ta cla pa cuminza cu su hazaña 100 dia den e mina di fosfat

Pa recauda fondo pa crea e Mega Museo Aruba - *Kier kibra e record mundial 'Guinness World Records'

ORANJESTAD (AAN) -- E dia ta yegando cu e ciudadano Henry Ras, mihor conoci como Heintje, lo bay drenta den e mina di fosfat pa un hazaña, di e forma ey pa yega na haya fondo pa por crea e Mega Museo Aruba.

Ras a yama un conferencia di prensa unda el a amplia tocante e reto cu e ta bay asumi.

El a splica cu “Fundacion di Antiguedad Nos Bieunan” ta presenta e evento Hazaña Mega Museo Aruba 2021. E hazaña di Henry “Heintje” Ras ta pa recauda fondonan pa e Mega Museo Aruba, un soño cu e kier realiza. 

Heintje Ras tin varios aña caba ta organiza tours den e mina di fosfat, tanto pa local como turistanan. E ta kere cu muchanan y nos hendenan tin derecho di sa nos historia. Ras tambe ta fungi como bombero y e ta un coleccionista di artefactonan hopi antiguo y historico.

E tambe tin un coleccion di autonan clasico. Su cas a bira un “cas-museo” y riba 3 di mei 2019, Ras a funda “Fundacion di Museo di Antiguedad Nos Bieunan Aruba”, y pa motibo cu su cas a bira chikito, e kier recauda fondonan pa yega na su edificio pa habri un Mega Museo Aruba. 

Ras kier kibra e record mundial den buki di Guinness World Records door di keda 100 dia den e mina di fosfat na Sero Colorado, bao di tera den e tunelnan di e minanan. E lo drenta Diasabra dia 2 di October 2021 y lo sali dia 9 di januari 2022, pa kibra e record mundial. E lo conta cu un team special, cu lo yuda, guia, como tambe controla su salud durante e hazaña aki.  

Nan ta spera di por conta cu apoyo di comunidad di Aruba, specialmente comerciantenan, den e hazaña aki, pa asina logra e fondonan pa realiza un Mega Museo Aruba.

E hazaña aki di 100 dia tin un storia su tras, segun Heintje a menciona.  Guinness Book of Records tin un serie di exigencia cu e mester cumpli cune y e ta cla pa enfrenta y cumpli cu tur. Un di e exigencianan ta cu na momento cu e drenta e buraco di e mina di fosfat e no por sali pa 100 dia. E no por weita Solo, ni un tiki di su claridad, tampoco Luna. No por tin coriente, fan, candela, ni lampi di kerosin y tampoco ningun tipo di Wi-Fi y comunicacion.

“Mi kier a gradici tur boluntario y team cu ta tras di e hazaña aki, cu ta kere den dje y e ta cla pa e reto”, el a expresa.