ORANJESTAD (AAN) – Den e conferencia di prensa di gobierno, Dialuna 27 di Maart awo, Minister Geoffrey Wever a yama dilanti e hefe di “Consumentenzaken”
na SEDECO, J. Tromp, pa e duna un splicacion tocante e website nobo cu a wordo lanza e dia aki tambe.
Tromp a menciona cu esaki ta e prome paso pa nan lanza un website, den cual lo trece hopi informacion pa e pueblo.
El a splica cu bishitando e website, na prome lugar e consumidor por entrega un keho via esaki, pa facilita e acceso pa e consumidor. Tambe si tin caso di Huurcommissie cu mester wordo entrega, por haci esaki tambe. Na banda di entrega kehonan e consumidor por wak diferente servicio cu e departamento ta brinda. E consumidor por puntra pa conseho huridico, tambe por pidi pa instruccion si ta traha di prijs di cas di huur. Ademas di esey, e ta haya diferente documento cu e consumidor por uza pa ora di entrega un keho.
Tromp a invita tur hende pa bishita e website, y si tin mas pregunta por haci esaki via email, y nan tin tambe un linea di WhatsApp 'only'. El a reitera cu esaki ta e prome paso pa brinda mas informacion y miho proteccion pa e consumidor, pa asina e por sa su leynan.
