Heart-Centered Leadership Foundation ta empodera educador y studiantenan cu ACE Program

Esnan di Colegio EPI

ORANJESTAD (AAN): Despues di 4 aña, Heart-Centered Leadership Foundation (HCLF) a trece e programa asombroso ACE (Achievement Commitment to Excellence) Program back na Aruba y a ofrece e programa na Colegio EPI den colaboracion cu Educare Foundation.

   HCLF ta conoci pa organiza ACE Program na Aruba desde 2012. Un programa impactante di HCLF su partner, Educare Foundation (Los Angeles), diseña pa duna alumnonan e confianza y motivacion propio pa nan por cumpli cu nan logronan personal y completa nan trayecto di enseñansa na manera exitoso. Den pasado, HCLF a brinda ACE Program na 5 school secundario alcansando 450 studiantenan y den dos otro ocasion a brinda e programa aki na un total di 170 hoben di tur skina di Aruba.

   Dia 13 di november, HCLF a brinda un Professional Development workshop pa 49 maestro di unit Ciencia y Tecnologia y unit Salubridad y Servicio, unda a cubri e tema di “heart-set education”. Esaki ta un concepto cu ta conscientisa docentenan con pa integra responsabilidad personal, empatia y compasion den nan manera di brinda sosten y guia na studiantenan na school, creando un ambiente positivo unda studiantenan por florece y realisa nan potencial apesar di e circumstancianan cu nan por ta encontrando den nan bida personal.

   Di 14 pa 16 di november, HCLF a ofrece ACE Program na alumnonan den nan prome aña di unit Ciencia y Tecnologia (C&T) y di unit Salubridad y Servicio (S&S). E proposito di e 3 dianan aki tabata pa promove formacion positivo den area personal, social y academico, cual ta duna espacio pa hobennan por desaroya habilidadnan cu lo por duna nan e forsa y perseverancia pa enfrenta retonan, maneha emocion, progresa y logra nan meta den bida. Un total di 72 studiante a completa e programa, acompaña pa un grupo di 15 maestro cu a tuma e rol di lider di grupo hunto cu 3 boluntario hoben adulto unda nan a sostene e studiantenan durante e programa pa asina nan por tabata tin e mihor experiencia.

   E programa tabata tin un evento cumbre unda a invita mayornan y amistadnan di e alumnonan pa scucha kico nan yiunan a experiencia durante e 3 dianan di e programa y celebra nan logro hunto. Adicionalmente, como parti di e proyecto cu por a ofrece ACE Program, HCLF a organiza un dia di training pa participantenan di e programa.

   Mientras cu durante ACE Program e enfoke tabata riba e impacto personal, e training adicional a enfoka riba con pa haci cambionan chikito y positivo na nan school. Participantenan a cuminsa e dia cu un momento di reflexion unda nan a haya e espacio pa analisa kico ta bayendo bon, menos bon y kico ta e cambionan cu nan kier mira den nan bida personal y na school. Despues, a invita Sr.Nevin Henriquez, un Transformational Speaker y Digital Business Consultant pa duna un sesion di motivacion riba e topico di con nan por haci un diferencia den nan comunidad, esta nan school, unda el a uza su experiencia bibando den exterior y aki na Aruba. Despues Sr. Henriquez a sigui cu un otro sesion riba con pa transforma nan ideanan den un proyecto.

   HCLF ta orguyoso di e esfuerso colaborativo cu a worde forma pa realisa e programa exitosamente. HCLF ta gradici Colegio EPI pa confia den e balor di e programa pa sigui enrikece e capacidad di maestronan y alumnonan. Ademas, ta extende un gradicimento na tur maestronan, alumnonan, boluntarionan, y partners cu a yuda haci e programa posibel. HCLF no por keda sin gradici tur esnan cu a contribui na e bingo fundraising di December 2022, cual a sostene e ehecutacion di ACE Program.

   ACE Program tabata posibel danki na fondo parcial di Programa di Participacion di UNESCO.