Hardin di Prinses Amalia School a haya nan prome fruta di Sorsaca

Monton di diferente fruta ta crece eynan

ORANJESTAD (AAN): E muchanan ta felis y contento cu loke e hardin riba nan tereno di scol a produci!  Recien e grupo di Living Soil Aruba a comparti e detaye, cu nan a bira alegre pa mira e prome fruta di Sorsaca creciendo na Prinses Amalia School.

   E ta un logro grandi pa tur e studiantenan, y e personanan entusiasma pa crea hardin na scolnan.  Nan a logra kita tambe un cantidad di fruta di Berehein cu a crece tambe den e hardin aki. Keto bay tin papaya ta crece, fruta ‘fig’, jack-bonen, tamarijn, y bacoba tambe.  Algun bacoba a wordo kita recien, y a resulta di ta delicioso.

   Recien a bin descubri cu e prome fruta di Sorsaca a cuminsa crece na un palo di mata cu tin den e hardin.  Esaki tabata momento di alegria pa e muchanan.

   E muchanan a tuma nan tempo pa yuda corta matanan demasiado largo, y kita yerba cu a crece aki-aya.  E hardin ta como un oasis di sombra cu yen di mata berde den dje.

   E hardin na e scol aki situa na Jupiterstraat na Playa ta sigui crece y pronto lo por bay mira mas fruta cu ta aparece danki na e cuido y amor di e muchanan aki.