Habitantenan kier embeyece bario pero tin algun cu no ta cooperando

ORANJESTAD (AAN): E pensamento tey cu awor cu Aruba ta den Siglo 21, cu tur caminda cayanan ta wordo haci bunita,

y Boulevardnan atractivo, y tambe varios Linear Park ta kedando cla... cu cada habitante tin di haci algo pa embeyece nan bario tambe.

   Y esey ta loke hopi hende kier tambe!  Si bo haci bo bario bunita, mantene caya limpi, elimina tur yerba malo, tur esey ta yuda pa bira un bista bunita, y tambe ta eleva e balor di cada cas y propiedad.

   Algun bario ta haciendo nan best pa e zona rond di nan casnan ta keda netchi.  Pero ta keda topa cu obstaculonan.  Y asina nan ta core yama DIARIO pa bay tira un bista, pasobra nan sa yama Bureau City Inspector sin ningun clase di accion.

    Enberdad, ta hopi habitante di tanto barionan nobo y esnan ya existente, ta percura pa nan casnan keda bunita, ta inverti hopi placa pa logra esey... pero toch bo ta haya 1 of 2 bisiña cu ta djis laga cos bieu benta pafo, creando asina un mahos bista pa e bario.  Esaki tambe ta baha e balor di cada cas.