Habitantenan di Bushiri Complex ta forma parti di e proceso pa mehora nan bario

ORANJESTAD (AAN):  Diadomingo atardi, Prome Minister mr. Mike Eman, a reuni cu habitantenan di Bushiri Complex na Bestuurskantoor y

a duna un presentacion di un proyecto ambicioso pa mehora e bienestar di e habitantenan di e casnan social di FCCA.

            Durante di e recien bishita di Accion di Bario na Bushiri Complex, a scucha e habitantenan y a traduci nan deseonan den un plan holistico den cual lo crea facilidadnan necesario pa duna e habitantenan di e bario un experencia completo den nan bario. Den pasado, e barionan social tabata consisti di un cantidad di cas banda di otro y un pida caminda, na unda e habitantenan mester a coexisti cu otro sin mucho cos di haci. Esaki a resulta hopi biaha den barionan fragmenta cu e habitantenan no tabatin mucho di haci como comunidad, y e hobennan tabata bay facilmente riba caminda robes pa falta di facilidadnan di recreacion.

            Durante e presentacion di e plan, e habitantenan a expresa nan deseo pa haya un greenhouse of espacio riba cual nan por desaroya un area pa planta matanan di berdura y fruta y a keda contento cu e plan nobo. Locual ta nobo den e plan aki ta e involvimento di e propio habitantenan cu ta contribui cu pensamentonan relevante pa nan bario.

            Habitante di Bushiri Sr. Elvin Geerman a gradici Prome Minister Eman pa ta conecta cu e pueblo pa haya sa kico realmente ta e dolor di e habitantenan di cada bario. Door di scucha e habitantenan, na momento cu ta crea maneho, e ta duna participacion directo den desaroyo di e barionan.

            Segun habitante di Madiki, Sra. Francy Arends-Lugo, e barionan di Bushiri a keda bandona pa hopi aña. “No tabatin nada concreto pa nan”. E unico cos cu tin pa e muchanan haci, ta riba e veld di futbol cu Prome Minister Mike Eman mes a traha durante su gabinete anterior. “E tempo ey, nan a kere den un veld pa e muchanan di Bushiri, y esey ta locual ta tene e muchanan bezig, voor de rest e luga ta deteriora”, Sra. Arends-Lugo a expresa.

            Cu e vision nobo, Gobierno, pa medio di FCCA, ta pensa riba facilidadnan deportivo basa riba e demanda di e hobennan di e respectivo barionan, un community center den cual e habitantenan di mas edad por bin hunto y organisa diferente actividad pa e bario, duna curso y crea programanan creativo pa yuda desaroya nan comunidad. E plan ta pa duna e famianan den e barionan e facilidadnan pa ta mas pafo di cas y den nan bario hunto y esaki ta inclui un cantidad di mata grandi pa duna sombra pero tambe voetpad, speeltuin pa e chikitonan etc.