Guizza Maria Steenvoorde di Aruba a conkista titulo maximo di Miss Teen Universe

Certamen den fin di siman na Rep. Dominicana

ORANJESTAD (AAN): Aruba su nomber a luci inmensamente den fin di siman cu a pasa, ora cu riba escenario den Ballroom di Lopesan Hotel Resort na Punta Cana na Republica Dominicana, e beyesa hubenil Guizza Maria Steenvoorde di Aruba a sa di bay cu e titulo maximo den e certamen di Miss Teen Universe.

    Guizza Maria,  ta hopi mas cu un reina di belleza: E ta un modelo Internacional talentoso, bailarina, cantante, poeta y pintora cu ta expresa su arte for di tempo cu e ta mucha. Su pasion profundo pa creatividad a duna e, e oportunidad pa conecta cu hendenan di diferente cultura, convirtiendo asina den un berdadero embahador di union y expresion artístico.

   Y su briyo di personalidad a yude grandemente e dianan cu a pasa na Republica Dominicana. 

   E plataforma di Miss Teen Universe semper a enfoca no solamente riba  belleza, pero tambe ta trata di trece dilanti proposito, influencia y cambio positivo.

   E certamen di Miss Teen Universe a tuma lugar den fin di siman na Lopesan Hotel Resort na Punta Cana.  Como MC a fungi Gabriela Coca.

   Publico a indica cu tur candidata ta bunita, sinembargo nan ta haya cu e representante di Aruba no a djis contesta e pregunta na e mihor manera, sino cu el a duna e mihor discurso di 30 seconde.  E no ta djis bunita y elegante, sino e ta tambe inteligente.

   Palabra di pabien na Guizza, y su famia y fanaticonan cu e gran logro aki.