Preparando pa Miss Teen Universe
ORANJESTAD (AAN): E simpatica Guizza Maria Steenvoorde, pasiona pa unidad y cultura, a bishita e Consulado Dominicano na Aruba na un momento importante den su bida, den caminda pa e gran experiencia di Miss Teen Universe cu tuma lugar na Punta Cana, 13 di April.
Durante su bishita, Guizza Steenvoorde a worde ricibi cu hopi candor y amabilidad pa Consul, Sr. Luis Eludis Perez. "Di momento cu mi a drenta e Consulado, mi a sinti un ambiente di famia, manera si mi tabata den e mesun tera di Republica Dominicana. Awo mi ta bay cu mi curason yena di gratitud pa e experiencia y cu hopi speranza pa e futuro di lasonan entre nos comunidad," el a bisa.
Guizza Maria a expresa su aprecio pa e manera nan ta traha pa fortalece e relacionnan entre Aruba y Republica Dominicana. Durante su bishita na e Consulado, e tabata tin e chens pa scucha di e proyectonan cu ta uni e dos isla, como tambe di e riqueza cultural y gastronomico cu ta forma parti di e herencia Dominicano.
“Esaki ta un trabao cu ta merese reconesementu, pa e manera amoroso ku nan ta dedica nan mes pa cu e comunidad,” Guizza Maria a agrega.
Cu e energia positivo y masha hop entusiasmo, Guizza Maria ta prepara pa representa Aruba na Miss Teen Universe, un concurso Internacional cu ta brinda e oportunidad pa inspira y empodera hobennan.
Dia 6 di April lo inicia e viahe pa Punta Cana den compania di su Team y ta gradici tur esunnan cu a tuma tempo pa yude den su trayecto y a graba su video di despedida.
E concurso ta tuma lugar riba 13 di April y ta conta cu 30 participante di diferente paisnan. Guizza Maria ta expresa su emocion pa por forma parti di un evento ku ta reuni mucha hoben di diferente cultura, acentua e oportunidad pa conoce mas tocante e tradicionnan y balornan di otro nacionnan, y crece no solamente como modelo, sino tambe como persona.
E intercambio cultural ta enrikece experiencia y lo percura pa cada participante hiba cune un muchilla di conocemento y amistad cu lo perdura pa un eternidad.
Aruba por vota, djis bay na e link missteenuniverse.1voting.com y asina nos por keda clasifica automaticamente den e TOP 6.
