Gobierno a anuncia:
ORANJESTAD (AAN): Entrante Diabierna 1 di Juli 2022, mr. Ady Thijsen lo ta encarga cu e funcion di Minister Plenipotenciario na Hulanda mientras sr. Guillfred Besaril ta bolbe Aruba.
Sr. Besaril a tuma e decision aki basa riba un evaluacion personal y familiar. Apesar di a acepta un segundo termino como Minister Plenipotenciario na comienso di Gabinete Wever-Croes II, sr. Besaril a conclui cu despues di a sirbi Pais Aruba pa 4 aña y mei den exterior, leu di su nucleo familiar, ta e tempo corecto tanto pa su persona como su famia pa bolbe cas.
Sr. Ady Thijsen lo combina e funcion aki banda di e funcion di representante na Union Europeo.
Arubahuis ta e representacion di Aruba na Hulanda, encarga pa asisti nos Arubianonan na Hulanda, pa promove Aruba riba tur tereno y pa fortifica e lasonan tanto entre Aruba y Reino Hulandes como Aruba y ful Europa.
Covid-19 y e estado deteriora di e edificio di Arubahuis, tabata tin un impacto grandi riba e actividadnan di Arubahuis. Sr. Ady Thijsen hunto cu directora ad interim señora Glenda Hernandez lo ta encarga pa continua cu e restructuracion y fortificacion di e organizacion di Arubahuis basa riba e vision di Gabinete Wever-Croes II, un instancia profesional, servicial y integro. Arubahuis lo muda dentro di poco pa un otro localidad mientras ta evalua e pasonan pa cu e edificio existente.
Desde e localidad nobo lo por brinda mas servicio. Den e restructuracion di Arubahuis lo tene cuenta cu e necesidadnan actual saliendo di e pandemia, y lo tene cuenta tambe cu e recomendacionnan haci pa Departamento di Recurso Humano y di Centrale Accountants Dienst, entorno di e investigacion reciente na Arubahuis. Mientras tanto, e investigacion ta yegando su fase final, y e momento ey Gobierno por duna mas informacion tocante e investigacion.
Gobierno di Aruba ta gradici sr. Besaril pa e servicio duna a traves di Arubahuis na comunidad Arubano desde november 2017 y ta desea sr. Thijsen tur clase di exito den e encargo nobo.
