Inflacion mundial por tin culminacion social pa dianan di fiesta
*Negoshi inoficial na peliger den e tempo mas productivo di aña
*Instabilidad ta sigui marca e indice economico forma pa petroleo
ORANJESTAD(AAN)- “Economia di sombra” ta e cualificacion di uno di e alanan importante den produccion y circulacion di placa na Aruba.
Ora papia di “economia di sombra” ta papia di loke ta crea entrada importante pa negoshinan inoficial cu ta produci articulonan y actividad comercial na e pais.
Costumbernan di dianan di fiesta ta e base pa den tempo normal, Aruba conoce un aumento di negoshi, cu ta yuda den basta gasto, cu generalmente ta wordo cubri cu e placa extra cu “economia di sombra” genera.
‘Cuanto placa ciudadanonan ta resta pa paga pa hayaca, creacion di dianan di fiesta entre otro, cu ta trece actividad pa tanto comercio registra y conoci como e negoshinan cu ta forma e economia si sombra?”
E pregunta pa cual DIARIO a busca un contesta hunto cu expertonan cu tin nan preocupacion enfrente e desaroyonan mundial cu ta causa problema na Aruba tambe.
Na 2022 na momento cu Aruba, mescos cu tur pais na mundo a planea cu recuperacion di e pandemia di Covid-19 lo tabata al orden, e invasion di Ukraine dor di Rusia, a hinca mundo den e rumbo di instabilidad.
E culminacion di e guera di petroleo tabata visibel ayera den e prijsnan di petroleo, cu mester cuminsa marca su salida pa wordo reemplaza pa energia limpi di acuerdo cu e palabracionnan alcansa pa confronta cambio di clima, cu ya mundo a cuminsa experencia.
Sinembargo, ta petroleo ta mantene mundo den suspenso, siendo un arma pa poder economico mundial, dificil pa reemplasa como tal.
Ayera prijs di petroleo a keda instabil, cu e prijs general riba 90 Florin pa Baril riba mercado internacional. OPEC cu a priminti cu e ta baha su produccion y causa aumento di prijs, ayera a baha su prijs un poco pero por a nota con practicamente tur otro productor mundial a subi nan prijs.
E Guera di Ukraine tabata otro fuente di preocupacion mundial serio, mientras Vladimir Putin a duna prueba cu e no ta hala atras.
Den e situacion aki, mundo ta yega na e ultimo parti di 2022, den un situacion cada rato mas pisa di inflacion y e peso di costo di bida, cu lo afecta e placa cu hende tin pa gasta durante dianan di fiesta.
Na Aruba den dianan di fiesta, e economia di sombra, semper tabata genera entrada extra cu cual tabata cubri gastonan manera di seguro y plachi di number di auto por ehempel pero tambe gastonan extra pa celebra Pasco.
Di produccion di hayaca pa articulonan di celebracion, articulonan di cas y paña, e entrada inoficial cu negoshinan den “sombra” tabata crea, ta wordo uza awor pa buraconan cu inflacion a crea den gastonan mas necesario.
Informantenan a splica DIARIO, cu pa comercio registra y oficial tambe e dianan di fiesta ainda por duna un resultado financiero cu ta decepciona debi pues na e forsa financiero di comunidad den e situacion mundial cu a comberti costo di bida den un peso grandi.
“Kico e futuro cercano general di mundo lo ta, ta keda cubri den inseguridad,” informantenan a indica pa finalmente a mustra e impacto cu e por tin riba e mundo comercial oficial di Aruba pero tambe e “economia di sombra” cu semper a yuda cubri parti di celebracion di e temporada di fiesta.
Mester remarca cu e “negoshi di sombra” no ta negoshi di black market ni parti di mundo di criminalidad y cu mayoria cu ta haci negoshi oficial cu e temporada di fin di aña ta raporta nan entrada na Gobierno!
