Accion economico ta habri porta pa negociacion pa solucion
*Acuerdo cu Mexico y Canada lo proteha frontera Mericano
*Informantenan experto ta papia di exigencia nobo pa Nacionnan Uni
ORANJESTAD(AAN)—“Mester vigila e mantencion di derechonan humano den tur ehecucion di leynan na tur pais na mundo.”
Esaki ta bini dilanti den combersacionnan cu DIARIO a hiba cu informantenan clave ayera ora suspenso internacional a presenta su mes a base di e desaroyonan sigur na Merca.
Pa drenta den e tema, di parti di informantenan Hulandes por nota e punto di partida cu Hulanda no por tene sin mas na e decisionnan cu ta wordo tuma den seno di Union Europeo cu no ta capaz pa controla e abuso cu ta wordo haci di e asistencia cu ta wordo duna na personanan cu no por biba mas na nan pais.
“Personanan cu no ta directamente na peliger pero no kier biba na nan pais a base di situacionnan di guera of condicionnan social desastroso, kier haci uzo di loke proteccion di personanan cu ta na peliger di morto, ta ricibi a base di sosten mundial.
Informantenan ta papia aki di creacion di abuso contra paisnan democratico cu ta bira responsabel pa situacionnan crea dor di gobiernonan totalitario y hasta ilegal manera ta e caso na Venezuela.
“Ora papia di asistencia na personanan cu ta victima di abuso politico social na cualkier forma na un pais, ta papia di kita fondonan for di paisnan liber, caminda Pueblo ta paga belasting y crea fondo pa e paisnan democratico, cu ta wordo forsa pa duna asistencia na victimanan di abuso politico of hasta crimen, cu ta brota den e exodo di paisnan cu ta cay den gara di dictadura.
“Proteccion di por ehempel e costa di Aruba tin como un exigencia sumamente grandi pa evita no solamente pa hende cu ta huy regimen di Nicolas Maduro drenta sin permiso na Aruba, pero tambe pa evita entre otro cu droga ta drenta e pais. Trafico ilegal di hende ta mara na trafico di droga, arma y tur loke ta wordo importa na forma ilegal cu ta e forma cu traficantenan ta uza personanan cu ta refugiado, pa nan comete negoshi criminal”, informantenan a indica.
E acuerdonan cu a worde alcansa na Merca ayera, ta habri porta ta un situacion completamente nobo no solamente pa Merca pero pa tur pais na mundo cu indirectamente of directamente ta wordo afecta dor di situacionnan cu gobernantenan tirano y abusador di Pueblo ta crea.
Informantenan ta papia directamente di e fayo di Nacionnan Uni, cu no ta actua manera mester spera di e organisacion, cu mester cera tur porta pa participacion di paisnan caminda derecho humano ta wordo kibra y desastrenan politico y social ta bira resultado.
Manera ta bini dilanti, no por ta cu paisnan cu si ta actua a base di un cuadro legal y democratico, ta bira victima di paisnan maneha pa dictadornan cu ta causa di refugiadonan y personanan cu sin permiso ta drenta paisnan y ta bira un amenaza serio pa seguridad personal y bienestar di e poblacionnan di e pais, ya cu nan mester gana placa pa nan biba den entre otro negoshi di droga, arma y tur loke ta ilegal.
Na mes momento paisnan democratico mester percura pa un infrastructura cu si ta honra exigencianan di leynan local y internacional y base di entre otro Nacionnan Uni.
E loke a pasa ayera na Merca, caminda a base di e demandanan di Presidente Trump, tanto Canada como Mexico a bay di acuerdo pa bini cu un maneho cu ta proteha e ciudadano Mericano na nan fronteranan contra crimen importa, ta segun informantenan e prueba cu Presidente Donald Trump a alcansa e prome parti di e solucion cu el a priminti Pueblo Americano, cu ta liberacion di e resultadonan di migracion indocumenta na frontera Americano.
Mexico y Canada a bay di acuerdo cu ta pone mas vigilancia contra trafico humano ilegal y entrada di droga na frontera Mericano durante e proximo 30 dianan mientras ta sigui papia cu Merca.
Presidente Donald Trump a uza tarifanan special pa importacion di productonan di Merca Canada como su arma pa a alcanza cu tanto Canada como Mexico ta bay duna proteccion y un maneho responsabel na frontera Mericano, cu nan fondonan y cu nan personal y ekipo durante e proximo 30 dianan. Die forma aki nan a deshaci di un tarifa (belasting) mas halto pa importa productonan di nan pais na Merca.
Na ciere di e edicion di awe di DIARIO, bista tabata fiha ainda riba China cu na prome momento lo a nenga di atende cu e propositonan di Presidente Donald Trump, pero den ayera lo a duna mas inclinacion pa atende e asunto cu e Presidente Americano y trata di yega na un acuerdo.
Pa China, Presidente Trump ta amenaza cu un belasting di 10 porciento riba importacion di nan produconan na Merca, si nan no atende cu e peliger cu importacion di droga pisa na Merca, ta presenta.
Tur bista ta keda dirigi riba paisnan grandi na momento cu Nacionnan Uni tambe lo mester cuminsa asumi su responsabilidad cu cera porta contra gobiernonan y paisnan, cu ta crea condicionnan cu ta produci necesidad, pa sin por ehempel un guera, paisnan comoce atrocidad social cu ta conduci na migracion incontrolabel.
