Randy Paskel, Hefe di Guardacosta Aruba:
*Pa seguridad di usuarionan di lama
ORANJESTAD (AAN) – Aruba a drenta den su temporada di campamento, for di Diadomingo cu a pasa, esta dia 2 di April.
Den entrevista cu Randy Paskel, Hefe di Guardacosta Aruba, a informa cu nan hunto cu KPA, ta coordinando pa intensifica nan control, cu e meta di garantiza orden riba lama y e seguridad di e usuarionan di tanto e beachnan como lama.
“Nos ta preparando nos mes, nos tin plannan cla, y nos personal tambe ta cla pa bay conhuntamente, garantiza cu nos temporada di campamento aki, bay na un manera bon coordina, safe y pa tur hende por disfruta di e temporada aki”, Paskel a menciona.
El a agrega cu nan ta traha hunto cu polis y rol di Guardacosta ta, primordialmente, asegura cu e botonan riba lama cumpli cu e reglanan.
Su mensahe pa tur usuario di lama, zorg pa nan embarcacion tin su papelnan na ordo, manera nan registracion y vergunning y pa e capitannan di e boto zorg pa nan licencia di navegacion ta na ordo, pa ora Guardacosta haci su control no tin nada particular y e dia por sigui na un manera contento pa tur hende, sin cu tin nodi di duna process verbal of para e actividad.
Nan lo eherce control, no pa haci fastioso, pero pa tur boto cu lo sali riba lama mantene nan regla y esnan cu ta kibra regla autoridad lo stop nan di haci esey.
Paskel a indica cu tin hende cu ta subi boto pa bay riba rif, y pa polis y guardacosta importante ta pa nan yega safe y cu ora nan baha bek tambe tur cos tuma lugar safe.
El a subraya cu eigenlijk e control aki ta tuma lugar durante henter e aña pero aworaki, den temporada di campamento, ta bay tin un aglomeracion unda mas hende ta bay haci uso di lama.
El a reitera pa e personanan cu ta bay conduci un boto, pa nan ta sigur cu tur cos ta na ordo, cu tin suficiente salbabida riba e boto pa cada un di e personanan abordo, pa zorg pa tin suficiente awa tambe, pa si acaso por haya algun problema, cu e personanan abordo tin acceso na awa.
Pa zorg pa tin un salbabida pa si acaso un persona cay riba awa un persona den e boto di biaha por rescata esun cu a cay den lama. Tambe posee un radio pa por comunica bek cu tera. Pa nan tene comunicacion cu e famia cu ta keda den cas, bise cu nan ta subi lama tal ora y ta bin bek tal ora. Esaki ta hopi importante. Mester tin telefon carga, e pomp riba e boto mester traha bon, e motor cu suficiente fuel, anker y suficiente cabuya ta hopi importante pa tin abordo, pa si acaso e motor faya mes, por tira e anker aki y keda cerca di tera pa e ora ey Guardacosta y Polis por bin duna asistencia. Di banda di Guardacosta e number di emergencia ta 193, of e number di polis cu ta 100.
