WILLEMSTAD: Tabata Diaranson cu famianan a bati alarma na Polis di Curaçao, pa informa cu e ciudadano conoci como Wladimir Wanga di 44 aña di edad ta perdi ya pa mas di 48 ora.
Nan a bisa cu Wladimir Wanga tin estatura di 1.85 meter, pues ta un persona basta largo. Ultimo biaha cu hendenan a mire tabata Dialuna anochi laat banda di 11:15 pm na area di Jan Thiel. Un security camera a capt’e, ora el a para su auto na banda, y despues por mire riba e video ta cana bay den direccion di mondi, y despues di esey no a tende nada mas di dje. Su smartphone tambe tabata mustra Jan Thiel como ultimo locacion.
Riba Diamars, Polis a cuminza yuda den buskeda, y a haci uso di Helicopter tambe di Guardacosta. Pero tur esey tabata envano. Famia y amigonan tambe a forma team di buskeda, cu a check den e mondi completo, pero no a haya rastro.
Pero debi cu e Disturbio Tropical tabata pasando den e area, autoridad a wordo obliga na stop cu e buskeda. Pero debi cu e tempo a pasa sin caso hopi fanfaria, a dicidi na sigui cu buskeda usando tecnologia nobo.
Mientras tanto, Diaranson anochi a drenta informacion cu personal di Guardacosta di Caribe Hulandes, usando drone special cu FLIR-Imaging, a logra di detecta un obheto den mondi di Caracasbaai, cu ta net banda di Jan Thiel mes.
Ora cu a yega cerca, a bin nota cu ta trata aki di e curpa sin bida di e homber aki. Pa awor Polis ta investigando kico exactamente.
