WILLEMSTAD: Tabata Diadomingo dos siman pasa, cu Centro di RCC di Guardacosta di Caribe Hulandes a ricibi informacion for di Polis, cu tin un piscado perdi riba lama.
E piscado Curasoleño aki a perde durante piscamento den e area di lama entre Daaibooi Beach y Restaurant Karakter.
Informacion cu a drenta ta mustra cu e piscado perdi aki a subi lama hunto cu dos amigo pa asina bay spearfishing. Dado momento e piscado hoben aki a bula di boto y drenta lama y a duik. Despues di esey nan no a mire mas.
Nan a cuminza busca rond cu nan boto, y despues di un ora a dicidi na bati alarma cerca Polis. Autoridad e ora a pone Guardacosta na altura.
Mesora Guardacosta a cuminza yuda cu buskeda usando speedboat tipo Metal Shark, y tambe e Helicopter. Esaki keda bula den henter e area.
Polis a manda un patruya tambe na Daaibooi pa asina for di tera yuda cu buskeda di e piscado. Daaibooi Beach ta situa como 19 km noordwest di Willemstad.
Henter siman pasa, Guardacosta hunto cu e avion Dash-8 di Guardacosta, y e Helicopter a sigui busca e piscado perdi. Pero despues di varios vuelo y patruyahe di buskeda riba lama, tanto door di Guardacosta y tambe famianan mes riba boto, nan no a haye.
Guardacosta a indica cu nan a stop cu e buskeda.
