Grupo Scout San Dominico a celebra 80 aña di existencia

Grupo Scout San Dominico di Noord, a celebra Diasabra ultimo, 80 aña di existencia, desde cu a ser funda na 1942.

E grupo a wordo re-funda na 1979. Un grupo no ta existi sin su lidernan ni su miembronan y nan kier a gradici cada un pa tur e añanan aki, ta parti di e gran famia di GSDN. Na Misa Santa Ana nan a celebra cu un Santo Sacrificio di Misa, cu presencia di tur lidernan y muchanan scout uniforma nan a celebra e bunita ocacion aki, y gradici Dios pa e 80 aniversario aki. Despues di e Santo Sacrificio di Misa nan tabata tin un brindis.

Seccion Hubentud den Movecion ta felicita Grupo Scout San Dominico cu e miho deseonan pa nan sigui crece, y brinda oportunidad na mas mucha y hoben bira parti di e famia aki, y participa den actividadnan scout y sirbi comunidad sanamente. Masha pabien!