0RANJESTAD (AAN): Grupo Scout Ora Ubao y Grupo Scout Casibari ta expresa nan inmenso orguyo cu
seis scout di Afdeling Hermes cu a huramenta dia 15 di september como miembro nobo di Parlamento Hubenil Aruba 2026–2027.
Afdeling Hermes ta reuni hobennan di 15 pa 18 aña di ambos grupo scout. E seis hobennan aki a demostra compromiso y dedicacion, sobresaliendo tanto den nan trayectoria den Scouting como den nan responsabilidadnan den Parlamento Hubenil: (*) Nasheijron De Windt (Mentor Hubenil), (*) Braydon Maduro (Minister Hubenil di Medio Ambiente), (*) Philip-Johnson Martinus (Minister Hubenil di Turismo y Cultura), (*) Elaine Caminata (Minister Hubenil di Labor), (*) Angelina Hart Garcia (Bos Hubenil), y (*) Samantha Romero (Minister Hubenil di Salubridad).
Nan instalacion ta un logro personal importante, pero tambe un momento significativo pa ambos grupo scout. E ta mustra con e balornan y habilidadnan cu hobennan desaroya den Scouting por prepara nan pa asumi responsabilidad y contribui activamente na comunidad.
Scouting ta mucho mas cu actividad recreativo. Door di trabao den ekipo, disciplina, servicio na comunidad y oportunidad pa tuma iniciativa, hobennan ta siña lidera cu responsabilidad, scucha otro, respeta diferencia di opinion y busca solucion hunto. Nan ta desaroya confianza den nan mes, fortalesa di caracter y un sentido profundo di compromiso cu sociedad.
Participacion di e seis miembronan di Afdeling Hermes den Parlamento Hubenil ta un ehempel concreto di e impacto cu Scouting por tin den bida di un hoben. Den ambos espacio nan ta haya oportunidad pa expresa nan voz, representa otro hobennan y transforma nan ideanan den accion positivo.
Grupo Scout Ora Ubao y Grupo Scout Casibari ta sumamente orguyoso di Nasheijron, Braydon, Philip-Johnson, Elaine, Angelina y Samantha. Nos ta felicita cada uno di nan y ta desea nan hopi exito den e periodo aki. Sigui lidera cu curashi, empatia y integridad, y laga e balornan di Scouting sigui guia boso den servicio di hubentud y comunidad Arubano.
