Grupo local ‘Aruban Warriors’ ta condena destruccion na naturalesa

ORANJESTAD (AAN): E grupo local conoci como ‘Aruban Warriors’, a emiti un boletin pa condena destruccion di naturaleza den distrito di Santa Cruz.

   Dia 14 di juli 2022 a cuminsa kibra un tereno eigendom panord di caminda na Picaron. Ya  tres aña pasa a destrui un tereno di sigur 40 mil m2 pazuid di caminda. Y mas p’ariba un tereno enorme ta worde destrui, hasta sero a worde basha abou door di compania di Heavy Equipment.

   Lider di Aruban Warriors, e señora conoci como Tacamahaca, su so a purba defende un palo di Watapana di sigur 50 aña bieu. Kwihinan chikito, tuna y bushinan a worde destrui. E doño, un Belga, anochi laat a bin grita manera alma malo dilant’i cas di Tacamahaca paso ningun hende tin nada di bis’e; e por kibra cuanto cu e kier na Aruba sin problema. Tacamahaca a invit’e paden pero el a cobardea cu miedo di end-up den hospital.

   Segun e, e pal’i Watapana ta di dje y e ta haci y deshaci cune manera e ta haya ta bon. Aki ta trata di un destructor di naturalesa indefenso cu no tin respet pa hende muhe tampoco, ni p’e grupo Indigena Arubano cu Tacamahaca ta representa.

   Tur locual e Belga, cu bendicion di gobierno actual, haci cu nos naturalesa lo bin back p’e y pa gobierno cu forsa incontrolabel, esey ta sigur.

   E grupo di Aruban Warriors ta bringa tur cu ta destrui nos mondinan y naturalesa cu forsa spiritual. Nan ta duda cu na Belgica e por tin tanto poder manera gobierno a dun’e na Aruba.

   Ken ta duna aanlegvergunning plus ontheffing pa kibra especienan proteha? Esey ta trabao di DIP y DNM y e Ministro ta responsabel pa duna ontheffing pa kibra cualkier mata y palo endemico y/of especie proteha riba lista di Cites. Esaki ta mara na condicionnan cu ta stipula cu e persona cu kibra un bushi (bolcactus) por ehempel, mester planta uno back. Wel bushi por plant’e chikito y e ta crece, pero ke hubo di matanan riba lista di proteccion manera Loki Loki, Pal’isia Cora of Behuco? Eseynan ta mata cu no ta facil pa planta. Ademas di esey ta dura añanan largo pa nan crece mescos cu un Watapana cu no ta proteha mes den nos leynan of Convenio di Cites.

   Tacamahaca a bisa cu ta parce cu Gobierno ta usa stroman pa pidi y haya tur permiso riba nan nomber y asina por destrui ful e mondi sin duna cuenta na niun hende y traha villa park pa gana placa. Aruba ta perde e tiki naturalesa cu a keda djis pa enrikece par di famia. Ningun hende no ta corda riba e parhanan, coneu y otro fauna cu, mescos cu e ser humano, tambe mester di naturalesa pa nan existencia. Nos leynan mester worde cambia y Tacamahaca cu otro abogado legislativo aliado mester percura pa esey.

   Nan lo denuncia e destruccion di Aruba na foro internacional di Indigenous Peoples di UN.  Aruba ta di Nos.