Grupo Kawara celebrando nan di 41 aña di existencia

ORANJESTAD (AAN): Grupo Kawara a celebra Diahuebs 1 di October, nan di 41 aña di existencia.

E dia aki ta un dia hopi special pa nos grupo, no solamente pa marca 41 aña di dedicacion na bienestar y compañerismo entre hende grandi, pero tambe pasobra e ta coincidi cu e Dia Internacional di Hende Grandi.

   Pa celebra e ocasion aki, Holiday Inn Resort Aruba a ofrece generosamente un desayuno pa Grupo Kawara den oranan di mainta.  E desayuno aki a duna nan e oportunidad pa pasa un bon momento hunto, den un ambiente di alegria, amistad y gratitud.

   Grupo Kawara ta consisti actualmente di 40 miembro, cu edadnan entre 60 y 91 aña, y 11 boluntario, cu tur hunto ta contribui na e funcionamento y e actividadnan di e grupo. Tambe nos ta aprecia enormemente e cooperadornan y personanan cu, durante e añanan, a duna nan apoyo pa nos por sigui realiza nos meta.

   Durante e desayuno di aniversario, miembronan, boluntarionan y cooperadornan a encontra y celebra hunto e trayectoria di Grupo Kawara. E ocasion tabata un momento pa recorda tur e añanan di amistad, compañerismo, actividadnan y, sobre todo, e importancia di no laga hende grandi sinti nan so.

   Nan kier expresa nan mas sincero agradecimento na Holiday Inn Resort Aruba pa e generoso desayuno y pa contribui na haci e celebracion di nos 41 aniversario un dia inolvidabel.

   Un agradecimento special ta bay na directiva di Centro Caiquetio, y tambe na sr. Joy Fingal ex boluntario di directiva di Centro Caiquetio pa su cooperacion durante tur e temporada cu a pasa y cu tabata un di nos invitadonan special awe mainta. Di parti di Grupo Kawara, sr. Fingal a ricibi un cariño pa su trabaonan boluntario pa cu nos grupo. Tambe nos kier a gradici Chogogo Tours, cu a facilita e transporte di e miembronan di Centro Caiquetio pa yega na Holiday Inn Resort Aruba y despues pa bolbe cas. E cooperacion di nos partnernan ta di gran balor pa e grupo.

   Grupo Kawara ta sumamente agradecido pa tur e donacionnan, apoyo y cooperacion cu nos a ricibi durante e añanan. Sin e generosidad di empresanan, institucionnan, boluntarionan y personanan particular, no lo ta facil pa nos sigui ofrece un espacio caminda hende grandi por encontra otro, participa, disfruta y sinti nan aprecia.

   E 41 aña di Grupo Kawara ta 41 aña di amistad, dedicacion, participacion y cariño pa nos hende grandi.

Nos ta mira cu entusiasmo pa futuro y ta spera di sigui traha hunto pa bienestar di nos comunidad di hende grandi.  Masha pabien Grupo Kawara.