Grupo grandi di hoben a bira parti di e proyecto Poder di Hubentud 2022

ORANJESTAD (AAN): Vanessa Croes ta lider di e proyecto Poder di Hubentud a presenta e grupo di e categoria di 15 pa 17 aña di participantenan di Poder di Hubentud, un proyecto realisa door di Asociacion Trabao di Hubentud Aruba (ATHA).

            E proyecto aki tin e meta pa reconoce e potencial di e hobennan na Aruba. Hobennan cu ta destaca den un of otro area. E vision tambe di e proyecto ta pa motiva e hobennan pa alcansa na metanan y pa nan desaroya nan competencianan na un nivel personal y profesional, Croes a splica.

            El a sigui bisa cu esaki ta pa forma lidernan cu ta trece punto y cambionan positivo pa Aruba den un forma structural y duradero.

            E hobennan presente a wordo reconoci entre otro riba area di desaroyo social, arte y cultura, educacion, innovacion, tecnologia, deporte y trabao boluntario. Nan a pasa den un trayecto di varios siman na unda cu nan ta bay ta haci diferente tayer, encuentronan hunto como grupo pa asina 'brainstorm' riba locual nan ta mira como un necesidad na Aruba.

            E hobennan a presenta nan proyecto y alabes a invita comunidad pa sostene nan y participa na dje tambe.

            For di 12 di Augustus, a cuminsa e proceso pa diferente persona por a aplica y nomina un hoben. Tur aplicacion a pasa door di un proceso di 'screening' y segun un criteria a bay mira cual tabata e hobennan cu por a participa y cu ta pas cu e criterianan aki pa por forma parti di e proyecto Poder di Hubentud 2022.