Grupo di Student Council di Colegio EPI H&T a bay conoce JOIA Iberostar Aruba

ORANJESTAD (AAN): Recientemente Student Council di Colegio EPI Hospitality and Tourism (Unit H&T)

a bay haci un bishita di orientacion na e recien inaugura JOIA Iberostar Hotel cu ta situa net na Eagle Beach.

   Nan a yega y a wordo ricibi door di Dominique Meyer di JOIA Aruba.  El a duna nan un splicacion breve di cada seccion di e Hotel, riba e diseño, e pensamento di e arkitecto, e aspecto di e hotel, e “colornan” di Aruba cu a wordo inclui den e diseño, e mueblenan, y tur aspecto con e empleadonan ta haci nan best pa duna e mihor servicio na e huespednan.

   Di e forma ey, e miembronan di Student Council a haya oportunidad pa conoce e hotel di cerca, y mira e piscina, e gazebo special pa matrimonio, e seccion priva di miembronan premium di Iberostar, parti di e seccion di Ballroom, e aula special pa duna les aden, y tur a goza di un cocktail refrescante di bon bini.

   Tin di corda cu den pasado, ya caba un grupo selecta di Colegio EPI a viaha te na Cancun pa asina core stage den un prestigioso resort di Iberostar na Mexico.

   Pa e tour aki na Aruba, nan tin di duna danki na JOIA Iberostar Aruba, como tambe miembronan di directiva di e Student Council, esta Jeandruw (president), Joshua (vice president), Camilla, Alexandra, Theron y meneer Oslin Briesen pa haci esaki possible.  Tambe danki na Chogogo Tours Aruba pa transporte.