Grupo di mayor ta contra introduccion di ideologia di genero na scol

ORANJESTAD (AAN):  Den un rueda di prensa diaranzon ultimo un grupo di mayornan preocupa a dicidi di trece luz riba un tema cu ta drentando nos sistema educacional y cu simplemente nan no ta tolera e tendencia aki.

Aruba ta conoci pa adopta tendencianan internacional facilmente. Pero no ta tur cos Aruba tin cu brasa y acepta sin considera e consecuencianan cu e lo por trece den futuro pa nos dushi isla Aruba.

Ta trata aki di introduccion di ideologia di genero den e scolnan basico. Mayoria mayor mainta ora nan hiba nan yiunan na scol ta desea nan un bon dia y

ta corda nan pa nan haci nan best na scol.

E motibo di esaki ta cu 10 di 10 mayor ta encurasha nan yiunan pa asina mañan nan por tin un bon trabou y un bon futuro. Educacion ta percura pa mañan e mucha por sostene su mes y su famia bon economicamente y contribui asina tambe na e sociedad y den nos caso na Pais Aruba.

Educacion na scol ta pa yuda e mucha desaroya su sentidonan cognitivo den forma di matematica, lenguahe etc. atraves di storia, conocemento general y por sigui menciona diferente metodonan practica den nos sistema educacional basa riba naturalesa obhetivo.

Naturalesa obhetivo ta tur locual tin di haber cu naturalesa, por ehempel un mata mester awa pa e crece, un simia mester wordo planta den tera pa e crece bira un mata y cu tempo e por produci fruta. Den klasnan mas halto muchanan ta siña desaroyo di un curpa humano y nan ta haya e principio di lesnan di reproduccion.

Pa bo crea un baby bo mester un cel reproductivo di un ser femenino y un cel reproductivo di un ser masculino. Na niun momento so, e ta e deber di e meastro of maestra di scol pa educa e mucha riba ideologia subhetivo cu no tin nada di haber cu naturalesa.

Ideologia subhetivo tin di haber cu locual bo ta kere aden. E mayornan ta splica cu no ta trata aki di discriminacion ni tampoco cu nos tin cu bay cu tempo, of cu e epoca cu nos ta bibando aden, y mucho menos e tin di haber cu religion. Religion ta un ideologia subhetivo.

Por ehempel un persona den e religion di Muslim ta kere den algo cu e ta lanta su yiunan den e creencia ey, pero cu no necesariamente ta cuadra cu un persona cu ta por ehempel un Catolico of un Cristian of un Ateista. Ideologia di genero ta cay den e categoria di ideologia subhetivo y no tin nada di haber cu lo natural.

Ora un baby nace, e por nace of un mucha muher of un mucha homber y esaki ta di naturalesa. Locual e ta scohe pa sinti, of locual e ta sinti pa ta, ta totalmente subhetivo. Na niun momento so e ta e deber di e scol pa educa nos yiunan riba e temanan aki.

E mayornan ta elabora:“E ta simplemente nos decision como mama, como tata, como voogd pa dicidi con, na ki momento y na cua edad nos ta educa nos yiunan riba e tema aki. E no ta e responsabilidad di niun maestro of maestra pa promove niun ideologia basa riba sentimento di un persona.”

E mayornan a presenta varios material como prueba di e infiltracion di e topico aki cerca nos muchanan cu ta tumando lugar aki na Aruba. Como conclusion e mayornan kier sa si Gobierno di Aruba ta na altura di e fenomeno aki y kico nan ta bay haci al caso.

E mayornan a termina bisando: “Nos no ta bay debati e topico aki. No hinca ideologia di genero den cabez di nos yiunan. Ta Basta! Laga mucha ta mucha!”